Վիգեն Սարգսյանի «Ես եմ» ծրագրին կփոխարինի Պապիկյանի «Պաշտպան հայրենյացը»

«Հրապարակ» թերթը գրում է.
Երեկ, կառավարության նիստում հավանություն է տրվել «Զինվորական ծառայության եւ զինծառայողի կարգավիճակի մասին» օրենքում փոփոխություններ եւ լրացումներ կատարելու մասին օրենքի նախագծին:

Պաշտպանության նախարար Սուրեն Պապիկյանը ներկայացրել է պայմանագրային զինծառայության նոր համակարգը, որը կոչվում է «Պաշտպան հայրենյաց» եւ որն էլ կփոխարինի նախկին նախարար Վիգեն Սարգսյանի կողմից ներդրված «Ես եմ» ծրագրին։ Պապիկյանի ծրագիրը ենթադրում է, որ պարտադիր զինվորական ծառայության առաջին 6 ամիսը լրանալուց հետո զինվորը կարող է ծառայության պայմանները փոխել եւ դառնալ պայմանագրային զինծառայող՝ պետության հետ կնքելով 5 տարով պայմանագիր։ Պապիկյանը, սակայն, շատ հետաքրքիր մի հանգամանք էլ է սահմանել․ «Պայմանագրի գործողության ընթացքում պայմանագրային զինվորական ծառայությունից հրաժարվելու դեպքում պայմանագրային զինծառայության ժամկետը չի հաշվարկվելու զինծառայողի պարտադիր զինվորական ծառայության ժամկետում, եւ զինծառայողն ուղարկվելու է՝ շարունակելու պարտադիր զինվորական ծառայության չծառայած մասը:

Այսինքն՝ եթե զինվորը որոշի «Պաշտպան հայրենյաց» ծրագրով անցնել իր ծառայությունը եւ, օրինակ, 4 տարի անց փոշմանի, ապա նա ստիպված կլինի եւս 1 տարի 6 ամիս ծառայել որպես ժամկետային զինծառայող»։

Ծրագրի ներդրմամբ նախատեսվում է դադարեցնել «Ես եմ» ծրագիրը, որի շրջանակներում, ըստ կառավարության, այժմ ծառայում է ընդամենը 2 զինծառայող, որոնց ծառայության 36-ամսյա ժամկետն ավարտվում է 2023թ. հունվարին: Հետաքրքիր է, որ 2019-ին «Ես եմ» ծրագրով զինվորական ծառայություն անցնելու համար դիմել էր 72 զինծառայող, իսկ 2017-2018 թթ.՝ 260։ «Ես եմ» ծրագրով զորակոչիկը ծառայելու էր 3 տարի, առաջին 5 ամիսը՝ ուսումնական զորամասում։ Մնացած 2,5 տարվա ամեն ամսվա 2 շաբաթը՝ մարտական դիրքերում, 1 շաբաթ՝ զորամասում եւ 1 շաբաթ էլ՝ արձակման մեջ, իսկ ծառայության ավարտին ստանալու էր 5 մլն դրամ՝ նպատակային ծախսերի համար, օրինակ՝ ուսման, հիփոթեքով բնակարանի ձեռքբերման եւ այլն, եւ այլն»: