Նորությու՞ն է, որ Նիկոլի օգնականը կամ ընկերը պիտի դատախազ դառնա

Այս իշխանության կադրային զինանոցում նոր բան փնտրել իմաստ չունի։ Եթե որևէ կադր են բերում, պիտի հասկանալ՝ սա ի՞նչ ծառայության նպատակով է բերվում։ Խոսքս ոչ թե հանրային, այլ մեկ մարդու ծառայելուն է վերաբերվում։

Սեպտեմբերի 16 -ին լրանում է ՀՀ գլխավոր դատախազ Արթուր Դավթյանի պաշտոնավարման ժամկետը: Գլխավոր դատախազն Ազգային ժողովի իրավասու մշտական հանձնաժողովի առաջարկությամբ ընտրվում է Ազգային ժողովի կողմից` պատգամավորների ընդհանուր թվի ձայների առնվազն երեք հինգերորդով, վեց տարի ժամկետով։ Գլխավոր դատախազի ՔՊ-ի թեկնածուն Աննա Վարդապետյանն է։ «Քաղաքացիական պայմանագիր» խմբակցության ղեկավար Հայկ Կոնջորյանը նշում է , որ 35- ամյա Աննան թե իր մասնագիտական որակներով, թե իր բարձր բարոյական ու արժեքային հատկանիշներով, նաեւ օրենսդրությամբ սահմանված պահանջներով համապատասխանում է այն կարեւորագույն առաքելությանը, որը պետք է ունենա ապագա ՀՀ գլխավոր դատախազը։ 

Եթե ՔՊ խմբակցության ղեկավարն այդպես է ասում, ուրեմն պիտի հասկանալ, թե որոնք են նրա նշած բարձր բարոյական ու արժեքային հատկանիշները։ Մասնագիտական կրթության մասին չեմ խոսում, քանի որ Հայաստանում Աննայի նման հազարավոր մասնագետներ կան, որոնք նոր իշխանությանն ընդհանրապես չի հետաքրքրել ու հետաքրքրում։ Ծանոթանում եմ Փաշինյանի իշխանության գալուց հետո նրա գործունեությանը՝ ՀՀ արդարադատության նախարարի տեղակալ, «Դար» տարածաշրջանային զարգացման և մրցունակության հիմնադրամի համայնքային զարգացման ծրագրի ղեկավար, 02.03.2020 թ․ նշանակվել է ՀՀ վարչապետի օգնական։ Էլ շարունակել պետք չէ։ Որևէ մեկը կարո՞ղ է կասկածել, որ Նիկոլ Փաշինյանն իրեն օգնական է կարգել մեկին, ով իրեն չի ծառայելու։ Ստացվում է որ մինչև գլխավոր դատախազ դառնալը կադրը լրիվ համապատասխանել է փաշինյանական բարձր բարոյականությանն ու արժեքային վեհ հատկանիշներին։ Առանց փակագծեր բացելու, ասեմ, որ Աննան լա՜վ վերահսկելի է Փաշինյանի կողմից։ Մամուլում այդ առթիվ բավականին աղմուկ եղել է, որ կոծկվել է։ Փաշինյանի կոմրոպատը այդ կոծկումն է, որն ամեն անպատեհ ժամի կարող է բացել։

Էդքան արժանիքներից խոսելու փոխարեն ասեիք՝ Նիկոլի օգնականն է գլխավոր դատախազ դառնում։ Նորությու՞ն է, որ Նիկոլի օգնականը կամ ընկերը պիտի դատախազ դառնա։

Հասմիկ Բաբաջանյան

«Հրապարակ օրաթերթ»