Փաշինյանը «քցո՞ւմ» է ընդդիմադիրներին, արտահերթ ընտրությունները կչեղարկվե՞ն

Մի քանի օր առաջ՝ մարտի 18–ին, Նիկոլ Փաշինյանը հայտարարեց, որ համաձայնության է եկել «Բարգավաճ Հայաստան» և «Լուսավոր Հայաստան» կուսակցությունների հետ հունիսի 20-ին արտահերթ խորհրդարանական ընտրությունների անցկացման վերաբերյալ։

Ըստ մամուլում հրապարակված տեղեկությունների՝ համաձայնությունը կայացվել է հին օրենսգրքով ընտրությունների գնալու նախապայմանով, որի ջատագովը նախեւառաջ ԲՀԿ ղեկավար Գագիկ Ծառուկյանն է: Գործող օրենսգրքով ընտրությունները կկայանան ռեյտինգային ընտրակարգով: Մի քանի օր շրջանառության մեջ դրված նոր Ընտրական օրենսգրքի վերաբերյալ վերջին օրերին իրենց առարկություններն են ներկայացնում նաեւ Լուսավոր Հայաստանի ներկայացուցիչները: Նրանք քննադատում են գործող իշխանությանը իր քաղաքական շահերը սպասարկող ԸՕ գրելու համար եւ կարծում են, որ եթե նման հում ԸՕ-ն ընդունվի եւ դրանով գնան ընտրությունների, ապա Հայաստանում վերջին ամիսներին հասունացած ներքաղաքական ճգնաժամն էլ ավելի կխորանա:

Չնայած ընդդիմության հետ պայմանավորվածությանը, Նիկոլ Փաշինյանի թիմը ակնհայտ դեմարշ է սկսել նրա դեմ եւ հատկապես սորոսական հատվածը պահանջում են ընտրությունների գնալ նոր ԸՕ-ով: Դանիել Իոաննիսյանը, բնականաբար, այս շերտի ամենաակտիվ ներկայացուցիչներից է: Հեղափոխության բաժնետերերն ուզում են, որ լինի կանխատեսելի համակարգ եւ հավասարը հավասարի ներկայացված լինեն ընտրացուցակում, ոչ թե խորհրդարան գործուղվեն օլիգարխները կամ նրանց հովանավորյալները:

Արդարադատության նախարար Ռուստամ Բադասյանն էլ լրագրողների հետ զրույցում վստահեցրել է, որ մինչև հունիս հնարավոր է ընդունել նորն ու նոր կարգով գնալ ընտրությունների. «Կուսակցությունների խաղի կանոններին պատրաստ լինելու մասով խնդիր չեմ տեսնում, որովհետև ակնհայտ է, որ կուսակցությունը պետք է ունենա իր համապետական ցուցակը, այսինքն` իրենց համար կանխատեսելի է, և հենց առաջինն ու ամենագլխավորը նման համապետական ցուցակ ունենալն ու ներկայացնելն է»:

Ընտրական օրենսգրքի առանցքային փոփոխությունը ռեյտինգային ընտրակարգից անցումն է ամբողջական համամասնական ընտրակարգի, այսինքն` փոփոխությունից հետո քաղաքական ուժերը ընտրողին կներկայանան միայն կուսակցությամբ։ Քաղաքացին ընտրելու է քաղաքական ուժին, ոչ թե իր հարևան թեկնածուին կամ թաղի հայտնիին:
«Գիտեք, որ տարիներ շարունակ ռեյտինգային համակարգը համարվել է քողարկված մեծամասնական համակարգ։ Հայաստանի նման երկրի համար ավելի ճիշտ է մաքուր համամասնական համակարգը»,–ասել է նախարարը։

Հարցին, թե հնարավո՞ր է հունիսի 20-ի ընտրություններն անցկացվեն նոր ընտրակարգով, Բադասյանը պատասխանեց, որ եթե փոփոխությունները տեղի ունենան հնարավորինս արագ, որևէ խոչընդոտ չի լինի, որպեսզի արտահերթ ընտրություններն անցկացվեն հենց համամասնական համակարգով` կուսակցական ցուցակներով։

Չի բացառվում, որ Նիկոլ Փաշնյանը հերթական բլեֆն է փորձել իրականացնել՝ հայտարարելով արտահերթ ընտրությունների մասին: Չի բացատվում, որ նա այսպիսի հայտարարություններով հող է նախապատրաստվում հերթական անգամ հրաժարվել արտահերթ ընտրություններից: Եթե խախտի պայմանավորվածությունը եւ ընտրությունների գնա նոր ԸՕ-ով, ապա ընդդիմադիր կուսակցությունները հնարավոր է չեղարկեն համաձայնությունը, կամ էլ Նիկոլ Փաշինյանը ընտրությունների կգնա իր ֆիլյալ ուժերի հետ, որոնք եւս պահանջում են նոր ԸՕ-ով գնալ ընտրությունների: Բայց միթե այսպիով կվերանա ներքաղաքական ճգնաժամը, դժվար է ասել:

Անի Սահակյան