Անդրանիկ Քոչարյանն իր երազած տղայի դերում է զգում

Իշխանությունն ու խորհրդարանական ԲՀԿ-ն Ազգային ժողովն այսօր վերածել էին ռինգի ու վերջին ամիսների ներքաղաքական մարտը տեղափոխել խորհրդարան։ Ընդդիմադիր պատգամավորները քննադատեցին իշխանության մարտի մեկի հանրահավաքը, որը իշխանությունը վերածեց տոնի: Նաիրա Զոհրաբյանի տպավորությամբ՝ Նիկոլ Փաշինյանն ասես Երեւանում Ալիեւի հաղթանակն էր տոնում՝ վուվուզելներով, դըմ-դըմփ հու-երով: «Իմ քայլի» պատգամավոր Արթուր Հովհաննիսյանն էլ իրեն հատուկ տհասությամբ հակակշիռ ներկայացրեց Բաղրամյանում զոհերի հիշատակի համար արված համերգը.«Այսպես որ շարունակվի, կդառնան երգի ու պարի համույթ։ Չի կարելի, ժողովրդի նյարդերի հետ են խաղում» ցինիկաբար հայտարարեց նա: Արման Աբովյանը հունից դուրս եկավ՝ պարի համույթը դուք եք եւ տրնգի եք պարում։
«Պարոն Աբովյան, կներեք, բայց իմ մոտ տպավորություն է, որ դուք հաճախ խոսում եք՝ ուղղակի խոսելու համար», հակադարձեց Ալեն Սիմոնյանը: Ընդդիմության եւ իշխանության դուելը Սերժ Սարգսյանով կտրեց Իմ Քայլից վերջերս դուրս եկած Սոֆիա Հհովսեփյանը՝ որքա՞ն կարելի է մերժել Սերժին եւ անկարողության անունը թավիշ դնել։
Իսկ մի ծեր խորամանկ էլ հին երգը երգեց: Անդրանիկ Քոչարյանի մոտ քրոնիկ փորացավը կրկին գլուխ բարձրացրեց եւ նա երեւակայեց իրեն ՊՆ նախարար ու փորձեց նախկին-ներկա հրամկազմի ներկայացուցիչներին իրենց տեղը ցույց տալ: Եւ այնքան էր տարվել իր երազանքներով, որ անամոթաբար հայտարարեց, թե ապրիլյան պատերազմում մենք պարտվել ենք: Իհարկե, նման բան ասելն ակտուալ էր մինչեւ սեպտեմբերի 27-ն ընկած ժամանակահատվածում, բայց, այն ինչ տեղի ունեցավ 44-օրյա պատերազմում,դրա համեմատությամբ ապրիլյանը ոչ միայն պարտություն չէր, այլ պատվով հաղթանակ էր ստեղծված իրավիճակից:
«Ընդդիմության կողմից վերջին օրերին հրավիրված հանրահավաքների ընթացքում Յուրի Խաչատուրովը ողջունում էր գլխավոր շտաբի՝ վարչապետի հրաժարականը պահանջելու վերաբերյալ հայտարարությունը։ Երեկվա հավաքին նա ելույթը սկսեց «ազգ-բանակ-հաղթանակ» վանկարկումներով։ Այս կարգախոսն իրապես ընկած էր արցախյան առաջին պատերազմի հաղթանակների կերտման հիմքում, որոնցում իր ներդրումն է ունեցել նաեւ Խաչատուրովը եւ այլ գեներալներ»,-իր հայտարարությունն այսպես սկսեց Անդրանիկ Քոչարյանը։ Նա նշեց․ «Այդ կարգախոսը, սակայն, փոխվեց հոկտեմբերի 27-ից հետո, եւ տարբեր առիթներով զինված ուժերը քաղաքական գործընթացների ակտիվ մասնակից դարձան: Այդ ժամանակ էլ բանակ ներթափանցեցին անտարբերությունն ու կոռուպցիան, որոնք էլ հանգեցրին 2016թ․-ի ապրիլյան պատերազմի պարտությանը եւ 2020թ.-ի երկրորդ պատերազմի ընթացքում ԶՈՒ-ի ղեկավարության կողմից բանակի ոչ պրոֆեսիոնալ կառավարմանը: Ինչպես Խաչատուրովը, այնպես էլ բազմաթիվ գեներալներ իրենց ծառայության ընթացքում բանակը քաղաքական նպատակների սպասարկու դարձնելու համար խրախուսվեցին ավելի բարձր կոչումներով եւ իրենց ուսադիրներին ավելացրին նոր աստղեր: Այժմ էլ այս նույն գեներալներից ոմանք եւս մեկ անգամ ապացուցում են, որ մարտի 1-ի դեպքերի ընթացքում «0038» հրամանով ուղղակիորեն մասնակցել են քաղաքական դրդապատճառներով բանակի օգտագործմանը: Եվ հիմա քաղաքական նպատակներով բանակը չօգտագործելու կոչեր անելու փոխարեն Խաչատուրովը, փաստորեն, ողջունում է դրանք: Ակնհայտ է, որ բանակին քաղաքական գործընթացների մեջ ներքաշելը նախապես մտածված է եւ դիտավորյալ է արվում՝ ներքին անկայունություն ստեղծելու նպատակով»։
Փաստորեն մի մարդ, ով հոկտեմբերի 27-ը փորձել է ծառայեցնել սեփական բարօրության, սակայն այդպես էլ չի հաջողացրել, այսօր խոսում է այդ օրվանից սկիզբ առած շրջադարձի մասին:

Անի Սահակյան