Մոլեգին պայքարը շարունակվում է՝ պողոսներին գոհացնելու օրակարգով

Մինչ հայ ժողովուրդը պայքարում է Նիկոլ Փաշինյանի ու իր իշխանության դեմ, որպեսզի Արցախը թուրքին հանձնելուց հետո Սյունիքի հանձնումը կարողանան գոնե կանխել,
Նիկոլ Փաշինյանի «քայլական» իշխանությունը շարունակում է անզիջում, կարելի է ասել՝ կատաղի պայքարը կոռուպցիայի դեմ: Փաշինյանի «հակակոռուպցիոն» մոլեգին պայքարը ծավալվում է, բնականաբար, վիրտուալ տիրույթում եւ բնականաբար, պողոսների համար:
Արդեն ամփոփել են 2020-ը՝ <<կոռուպցիայի դեմ պայքարի ոլորտի ձեռքբերումները>>: Ըստ տարածված հաղորդագրության, իշխանությունն անխնա տեմպերով առաջ է շարժվել քաղաքական կոռուպցիայի բացահայտման ուղղությամբ, թերեւս նկատի ունեն հայտարարագրերի ստուգում, ապօրինի գույքի բռնագանձման վերաբերյալ չորս գործ է հարուցվել, ստուգել են դատավորների բարեվարքությունը եւ այլն: Մի խոսքով՝ վարչապետի կայքում մի քանի էջանոց լավաշի բովանդակությամբ կարող եք ինքներդ սադոմազոխիզմով զբաղվել: Նախապես ասենք, որ այդ այսպես կոչված ամփոփաթերթում ոչ մի տող չեք կարդա ներկա իշխանությունների վերաբերյալ արձանագրումների:

Այո, նաև կոռուպցիայի դեմ պայքարի դրոշներով իշխանության եկած Նիկոլ Փաշինյանն «իր քայլականները» այնքան ինքնամոռաց են պայքարում կոռուպցիայի դեմ, որ իրենք էլ երևի լավ չնկատեցին, թե ինչպես են բավականին սահուն ու հարմարավետ հայտնվել նույն այդ կոռուպցիայի գրկում: Մամուլում առնվազն տասնյակ նյութեր կան իրենցքայլականների բարձրահարկ ձեռքբերումների մասին: Ու մնչև պաշտոնական հաղորդագրությամբ փորձեցին թմբկահարել իրենց բացահայտումները, լրատվամիջոցները բացահայտեցին վարչապետի տիկնոջ 600 դոլարանոց շարֆի մասին, որը նա կրել էր զոհվածի տուն այցելելիս: Բա կոռուպցիան պոզով պոչով է լինելու, ինչպես եւ ինչ միջոցներով է Փաշինյանի տիկինը իրեն նման ճոխություններ թույլ տալիս:

Ավելի վաղ գրվել է Փաշինյանի աներձագը լինելու հետևանքով ԱԺ պատգամավոր դարձած Հրաչյա Հակոբյանի 25 հազար դոլարանոց ձորաղբյուրյան առանձնատան մասին: ԱԺ փոխնախագահներ Լենա Նազարյանի, Ալեն Սիմոնյանի թանկանոց բնակարանների, վերջինի ավտոմեքենաների մասին: Շիշ բռնողի բիզնես կայսրության, մյուսների թռիչքային աճի մասին: Հենց միայն համակարգված պարգեւավճարներն արդեն տեղով մեկ կոռուպցիա են, գումարած՝ ընկեր-ծանոթ-բարեկամներին պառլամենտում և գործադիր իշխանության մարմիններում կամ այլ կառույցներում տեղավորելը:

Բայց ոչ իշխանությունների օրակարգում անգամ հետպատերազմական ժամանակաշրջանում նախկիններն են, նրանց <<վնգստացող>> դատավորները: Այնինչ եթե կուզեք, իշխանության թիվ մեկ խնդիրն այսօր հակակոռուպցիոն շոուների փոխարեն պետք է լիներ Հայաստանի անվտանգության ապահովումը, նախեւառաջ Սյունիքի հարցը, իսկ այստեղ ամեն օր ինչպես Բագրատյանը կասեր՝ տալաշ-տալաշ հանձնում ենք Փաշինյանի կիրթ ու կառուցողական գործընկերոջը:

Անի Սահակյան