Իշխանությունը երկարացնում է իր հոգեվարքի նոպաները

Այսօր ԱԺ արտահերթ նիստ կգումարվի, որի օրակարգում է լինելու «Լուսավոր Հայաստան» խմբակցության նախագիծը՝ «Ռազմական դրությունը վերացնելու մասին»: Կասկած չկա, որ իշխանությունն այս անգամ էլ կմերժի ԼՀԿ-ի եւ ԲՀԿ-ի նախաձեռնությունը, ինչպես որ դա արեց նոյեմբերի 18-ին: Քանզի հոգեվարքի մեջ գտնվող իշխանությանը վերջին թպրտոցների հնարավորություն տվողը հենց այս դրությունն է, դրա միջոցով են ճնշում ընդվզումները, ընդդիմադիրների բողոքի ակցիաները, նրանց քրեական հետապնդման ենթարկում, բռնում-թողնում, քրեական գործեր հարուցում ու տպավորություն ստեղծում, որ իշխանությունն իր բռում է, որ ոչինչ էլ չի պատահել, այնինչ այդ ամենն իրականացնում է իր յուրային գործարարների թիկնազորից կազմած հերոսակախմբերի միջոցով:

Սա այն դեպքում, եբ ՀՀ Զինված ուժերը, ըստ էության, դեմ չեն ռազմական դրությունը վերացնելուն: Դեռեւս նոյեմբերի 10-ին ԶՈՒ շտաբի պետ Օնիկ Գասպարյանը մեկ շաբաթ ժամանակ է խնդրել այդ դրությանն առնչվող հարցերը լուծելու համար, որից հետո էլ ընդդիմությունը առաջին անգամ հանդես եկավ նման նախաձեռնությամբ: Ակնհայտ է, որ հարցը քաղաքական տիրույթում է եւ դա իչպես ասացինք պետք է իշխանությանը քաղաքական հարցեր լուծելու համար: Սա պարզ դարձավ նաեւ երեկ
ԱԺ պաշտպանության եւ անվտանգության հարցերի հանձնաժողովի նիստում նախագծի քննարկման ժամանակ: Իշխանական պատգամավորները չունեին հստակ եւ փաստարկված բացատրություններ, թե ինչու է հարկավոր, որ ռազմական դրությունը պահպանվի: «Լուսավոր Հայաստան» խմբակցության քարտուղար Գեւորգ Գորգիսյանը բացատրեց, որ նոյեմբերի 9-ին Հայաստանի, ՌԴ-ի եւ Ադրբեջանի միջեւ կնքված պայմանագիրը վերջ դրեց մարտական գործողություններին, դրանից հետո ՀՀ վարչապետի եւ ՌԴ նախագահի ու ՌԴ ԱԳ նախարարի հայտարարությունները եղան,որ այլեւս անվտանգությունը կարելի է համարել ապահովված, հետեւաբար այն բոլոր հիմքերը, որոնք բերվել էին ռազմական դրություն հաստատելիս, այն է՝ ռազմական սպառնալիք կա ու զորահավաքի կարիք, վերացվել են:

Հիմա, ըստ պատգամավորի, ոչ սպառնալիք կա, ոչ էլ զորահավաք: Բայց սահմանափակումները՝ խոսքի ազատությունը, ազատ տեղաշարժը, հավաքների ազատությունը, շարունակում են գործել: Երկքաղաքացիները չեն կարողանում երկրից դուրս գալ, սահմանափակումները նաեւ խանգարում են մեղմել ճգնաժամը, որն այսօր կա:

Հանձնաժողովի նախագահ Անդրանիկ Քոչարյանը, ով ըստ էության վայելում է պաշտպանության նախարարի իր ոչ անմիջական պորտֆելը սկսեվ ճամարտակել.«Ռազմական դրությունը հանաք բան չի: Այսօրվա թե՛ Արցախի հանրապետությունում, թե՛ Հայաստանի խնդիրների լուծումը էապես կախված են թե՛ ռազմական գերատեսչության՝ ԳՇ-ի, թե՛ այսօրվա գնահատականի հետ: Մենք այսօր պետք է կայացնենք որոշում: Եթե նրանց գնահատականը չունենք…7 օր առաջ ԳՇ պետն ասել է հնարավոր է, դա այսօր չի նշանակում, որ պահն է, այսօրվա գնահատականն ունե՞ք»: Գորգիսյանն ասաց, որ ՀՀ վարչապետի, ՌԴ նախագահի եւ ՌԴ ԱԳ նախարարի հայտարարություններն ունեն, որ անվտանգության խնդիրները արդենիսկ լուծված են. «Լավրովի եւ Պուտինի հայտարարություններից հետո կարիք չի եղել»: Անդրանիկ Քոչարյանն ասաց. «Դուք քարտեզը բնականաբար շատ լավ կարողանում եք կարդալ, տիրապետում եք, տեսնում եք, որ մեր տարածքների պահպանության ենթակա տարածքները անգամներ մեծացել են եւ երկարությունը սպասարկելու համար հատկապես ԶՈՒ կարողությունները պետք է վերահաշվարկ անենք: Ռազմական դրության ռեժիմն է թույլ տալիս դա: Պետք է բոլոր հանգամանքները հաշվի առնենք, ոչ թե՝ ՌԴ նախագահը սա ասեց, ասվեց, որ օդը փակ է եւ այլն»: Գորգիսյանը հակադարձեց, թե կառավարությունը կարող էր 16 օրվա ընթացքում դա անել, բայց չի արել: Մոտ մեկժամյա քննարկումից հետո, ինչպես ե սպասվում էր իշխանականները մերժեցին ռազմական դրությունը վերացնելու առաջարկը՝ երկարաձգելով սեփական հոգեվարքը:

Անի Սահակյան