Ինչ է տեղի ունենում ռազմաճակատում

«Ինչպես 1992-ին, երբ մեր հաղթարշավը սկսվեց Շուշիի ազատագրումից, այսօր էլ մեր հաղթարշավը պայմանավորված է Շուշիի պաշտպանությունից: Թշնամին գտնվում է Շուշիից ընդամենը մի քանի կիլոմետր հեռավորության վրա, առավելագույնը՝ 5: Թշնամու գերնպատակն է գրավել Շուշին, տիրանալ Շուշիին»,- քիչ առաջ ֆեյսբուքյան իր ուղերձում հայտարարեց Արցախի հանրապետության նախագահ Արայիկ Հարությունյանը:

«Ինչպես ասում են՝ ով տիրում է Շուշիին, տիրում է Արցախին: Ուզում եմ գիտակցենք այս պահը եւ գիտակցենք ոչ միայն լոկ խոսքով, այլ անմիջական մասնակցենք Շուշիի պաշտպանությանը»,- ասաց ԱՀ նախագահը՝ հավելելով, որ առաջին անգամ ինքը Շուշիում եղել է 1992 թվականի մայիսի 8-ին, եւ առաջիններից է եղել, որ մտել է Շուշիի սբ. Ամենափրկիչ եկեղեցի ու համբուրել է խաչը. «Այսօր էլ համբուրել եմ խաչը, աղոթել եմ, մոմ եմ վառել հանուն մեր հաղթանակի: Իրականում ես հավատում եմ, որ մենք հաղթելու ենք, իրականում ես հավատում եմ, որ այս օրերը լինելու են բեկումնային: Դրա համար մեզ պետք է միավորվել, դրա համար պետք է կռվել, դրա համար պետք է պատժել թշնամում, բայց դրա համար պետք է նաեւ ժամ առաջ հասնել Արցախ: Իհարկե, սա խուճապային ելույթ չէ, այլ հակառակը: Ես հավատում եմ հաղթանակին, քան երբեւէ: Օրերի ընթացքում պետք է բեկում մտցնենք ճակատում եւ պետք է պատժենք հակառակորդին՝ հենց Շուշիի դարպասներում: Եկեք միավորվենք եւ միասին կռվենք: Իհարկե, հասկանում ենք, գիտակցում ենք ամեն ինչ, բայց նաեւ եկեք մեր ամենամեծ առաքելությունը կատարենք հանուն հայրենիքի, հանուն մեր ապագայի, հանուն մեր սերունդների: Հաղթանակը մերն է լինելու, համոզված եղեք: Ես հավատում եմ հաղթանակին»

Նախագահի կոչից մեկ ժամ անց տեղի ունեցավ ՊՆ ներկայացուցիչ Արծրուն Հհովհաննիսյանի ճեպազրույցը, ով բառացիորեն հայտնեց. «Հարավային հատվածում՝ Բերձորից մինչև Արաքսի ափն ընկած ռազմաճակատային բնագծի ուղղությամբ, եղել են որոշակի մարտական գործողություններ, մեր ԶՈՒ-ին հաջողվել է որոշակի դիրքերի բարելավում իրականացնել»։

Հովհաննիսյանը նշեց, որ Մարտունու և Ասկերանի շրջանների գյուղերում ատառային զանգվածի հարակից տարածքներում շարունակվում են դիվերսիոն խմբերի դեմ մարտական գործողությունները։

Հիմա հարց է առաջանում, եթե մեզ հաջողվել է որոշաի դիրքերի բարելավում իրականացնել հարավում, ապա թշնամին ինչպես է հասել Շուշիի մատույցներ: Շուշի հասնելու ճանապարհը հարավից է, եւ հակառակորդն առնվազն պետք է առաջխաղացում ունենար այդ հատվածում, որպեսզի հասներ Շուշի: Ինչ է տեղի ունենում ռազմաճակատում, ինչու են պաշտոնական տարբեր աղբյուրներ եւ ներկայացուցիչներ տրամագծորեն հակառակ ինֆորմացիա տարածքում, դժվար է ասել, թերեւս կարիք կա հավելյալ պարզաբանման, քանզի ամեն օր ներկայացված քարտեզն էլ առանձնապես փոփոխություն չէր կրել:

Անի Սահակյան