Կամ ՀԱՊԿ ից դուրս եկեք, կամ կողմնորոշվեք

ԱԺ փոխխոսնակ Ալեն Սիմոնյանը լրագրողների հետ ճեպազրույցում հարցին՝ ՀԱՊԿ-ին դիմելու անհրաժեշտություն չե՞ք տեսնում՝ պատասխանել է. «Առաջին իսկ օրվանից բոլոր հնարավոր ուղղություններով կատարվում են աշխատանքներ: Այդ աշխատանքները կատարվում են՝ ի հեճուկս ամեն ինչի, որեւէ բան հաշվի չի առնվում, նկատի ունեմ՝ ինչ-որ մեկին ավել մի բան խնդրելու, մի քանի ժամ կամ մի ամբողջ օր ավել աշխատելու: Որեւէ բան չի խանգարում ու բոլոր ուղղություններով աշխատանք տարվում է: Մեր ազգի ցանկությունները հաճախ չէ, որ համընկնում են: Ինչ վերաբերում է դաշնակիցներին, կոնկրետ երկրներին, այսօր մենք ունենք մի գործընկեր, որը մեզ ամեն ձեւով աջակցում է: Այդ աջակցությունը դուք ինքներդ տեսնում եք՝ հայտարարությունների, նույնիսկ ուղիղ խոսքի ձեւով, դա ՌԴ-ն է, ինչպես նաեւ կարող եմ նշել Ֆրանսիայի մեր գործընկերների աջակցությունը եւ ԱՄՆ-ի աջակցությունը, որը դուք նույնպես տեսնում եք: Մնացածը ասել այս պահին չեմ կարող»:

Կոնստանտին Զատուլինն ասել էր, որ ինքը չի հասկանում,  թե ինչու հայկական կողմը չի դիմում ՀԱՊԿ-ին, նիստ է եղել, բայց հարցն օրակարգ չի մտել: Այս առնչությամբ Ալեն Սիմոնյանն ասաց. «ՀԱՊԿ-ին դիմելու համար նախեւառաջ մենք պետք է վստահ լինենք, որ այդ կազմակերպությունը եւ գործողությունները բավարար կլինեն, որպեսզի համապատասխան արձագանք լինի: Դուք գիտեք, որ ՀԱՊԿ-ում եւ նմանատիպ կառույցներում որոշումները կայացվում են կոնսենսուսային տրամաբանության մեջ: Այն պարագայում, երբ որ մենք կտեսնենք, որ արդեն իսկ անհերքելի փաստեր կան, որոնք դժվար կլինի ՀԱՊԿ-ի քննարկման ընթացքում կասկածի տակ դնել, դուք գիտեք, որ Հայաստանն է հանդիսանում ՀԱՊԿ-ի անդամ եւ Արցախը այդ կազմակերպության մեջ չի: Որպեսզի տեղ չթողնենք այսպես ասած սեթեւեթելու կամ ինչ-որ ձեւով խուսափելու, այդ քայլը կարվի այն ժամանակ, երբ վստահ կլինենք, որ այն կստանա միանշանակ դրական պատասխան: Ինչ վերաբերում է մնացածին, այսօր մենք դրա կարիքը չունենք, չեմ կարող շատ բան ասել, բայց Հայաստանի սահմանների վտանգի պարագայում, ես ձեզ վստահեցնում եմ, մեր գործընկերները, մեր դաշնակիցները չեն թողնի այդ իրավիճակը շատ խորանա»:

Փաստորեն, պատերազմի առաջին օրերից, երբ հակառակորդը ոտնձգություններ էր անում ՀՀ տարածքում եւ նրա սահմաններին, մասնավորապես, Վարդենիսում եւ Կոտայքում, Նիկոլ Փաշինյանը հայտարարում էր, որ ՀԱՊԿ-ին դիմելու անհրաժեշտություն կա, մենք ինքներս կպահպանենք մեր անվտանգությունը: Հիմա, երբ Հայաստանի հարավային դարպասների մոտ մի քանի օր է թեժ մարտեր են ընթաում, իսկ ՊՆ-ն հայտարարեց, որ հրետակոծել է Իրանի հետ Հայաստանի հարավային սահմանի հատման կետի հայկական սահմանապահ ուղեկալի դիրքերը, երբ անօդաչու թռչող սարքերից (ԱԹՍ) մեկն ընկել է Հայաստանի տարածքում, Հյաստանում դեռ չեն կողմնորոշվում՝ դիմել ՀԱՊԿ-ին, թե չդիմել՝ վստահ չլինելով, որ դրական պատասխան կստանան: Եթե կասկածի տակ է դրվում ՀԱՊԿ-ի արձագանքը, որքանով է նպատակահարմար Հայաստանի՝ այդ կառույցում մնալու հարցը: ՀՀ իշխանությունները կամ պետք է հայտարարեն ՀԱՊԿ-ից դուրս գալու մասին, կամ էլ մինչեւ կողմնորոշվեն, հնարավոր է Հայաստանն էլ կորցնենք:

Անի Սահակյան