Սասուն Միքայելյանը խանդի տեսարաններ է ցուցադրում

Հանրապետության ողջ տարածքում աշխարհազոր ստեղծելու մասին Պաշտպանության նախարարության հայտարարությունից հետո շուրջ երկու ամիս է լուրեր են շրջանառվում, որ այդ իդեան ներիշխանական գզվռտոցի առիթ է հանդիսացել Նիկոլ Փաշինյանի եւ ԵԿՄ նախագահ Սասուն Միքայելյանի միջեւ: Ինչու է ստեղծվում աշխարհազորը, եթե Հայաստանը կանոնավոր բանակից բացի մի հատ էլ Երկրապահ ունի, շատերի մոտ է հարցը ծագում: Ոմանք գտել էին նաեւ պատասխանը, այն լինելու է ԵԿՄ-ի այլընտրանքը եւ օգտագործվելու է ներքաղաքական նպատակներով: Նիկոլ Փաշինյանը, ըստ ամենայնի, չի վստահում նախկինների դասին պատկանող Սասուն Միքայելյանին եւ առաջիկա ընտրություններին ընդառաջ ապահովագրում է իրեն աշխարհազորով: Տեղեկություններ կային, որ Միքայելյանը խիստ վրդովված է այս նախաձեռնությունից, նա տեւական ժամանակ չէր ցանկանում խոսել այդ մասին, անկախության տոնին նա վերջապես խախտեց լռությունը եւ միգուցե ոչ ուղիղ տեքստով, բայց ցույց տվեց իր դժգոհությունները .«Ես կողմ եմ աշխարհազորի ձևավորմանը, բայց մեծ քանակությամբ։ Երկրապահը կա, երկրապահ։ Այսօր եթե վերցնենք առաջին, իսկ հրահանգի դեպքում 10 հազար մարդ, գոնե 8 հազար մարդ զորավարժությունների ժամանակ մենք դուրս ենք եկել, չէ՞։ Պատրաստի կառույց է, աշխարհազորին չխանգարող, թո՛ղ աշխարհազորը ձևավորվի, ես կողմ եմ աշխարհազորին, բայց թո՛ղ նորմալ ձևավորվի։ Հետագայում խնդիրներ կլինեն, ինչ կլինեն, չգիտեմ, բայց այսօր կա ԵԿՄ-ն՝ որպես հասարակական կազմակերպություն։ Եվ ես շուտով հրաման եմ տալու, որ Երկրապահը, մենք գիտենք ինքնամաքրման ենք գնացել, հեսա բացելու եմ երկրապահը։ Այսինքն՝ պատերազմող մարդիկ աշխարհազոր կլինի, երկրապահ կլինի չի խանգարի։ Եթե հետագայում լուրջ աշխարհազոր ձևավորվի Երկրապահի անունը թո՛ղ մոռանան բոլորը, որ հանկարծ Երկրապահի անունը կփոխվի, որովհետև դա ստեղծել է Վազգեն Սարգսյանը, դա անջնջելի է։ Իսկ կից աշխարհազորին կարող է հետագայում լինել»,- այսպիսի հուզառատ կարծիք է հայտնել նա:
Թե ինչից է դժգոհ պարոն Միքայելյանը, ով թավշյա հեղափոխությունից հետո հայտարարում էր, որ ԵԿՄ-ն պետք է լուծարվի, իսկ երբ հերթը հասավ իրեն ու որոշեցին այդ պոստը իրեն վերապահել, հանկարծ մոռացավ նախկին հայտարարությունները, զբաղեցրեց Մանվել Գրիգորյանի տեղը, բայց ի տարբերություն գեներալի ավերեց կառույցը: Տարածքային կառույցներում այժմ ամայություն է, նախկինները հեռացել են, նորեր չկան, որեւէ մեկը չի ցանկանում այս մարդկանց հետ ճանապարհ գնալ, Սասուն Միքայելյանին հաջողվեց ԵԿՄ-ն միավորել գաղափարի շուրջ մի պարզ պատճառով, քանի որ գաղափար էլ չկա: Մի կողմից՝ Միքայելյանը խանդի տեսարաններ է բեմադրում, մյուս կողմից կհաջողվի՞ նրան՝ այս ավերակաց թագավորին, պատերազմի ժամանակ 2-3 հազար երկրապահ հանել սահման, ինչպես անում էր Մանվել Գրիգորյանը: Հատկապես, որ պատերազմի վտանգը դամոկլյան սրի պես կախված է մեր գլխավերեւում եւ ինչպես Սասուն Միքայելյանի խոսքից է երեւում, գոնե նա հասկանում, տեսնում է Թուրքիայից սպասվող վտանգը: Բայց այս ավերակացով, ջլատված ռեսուրսներով, երբ իր աչքի առջեւ հերոսներ են վարկաբեկվում, երբ բանակում չծառայած իր դասալիք ղկավարը հրապարակավ նսեմացնում է այդ հերոսներին, արժեզրկում, փոշիացնում ամեն բան, ինչով եւ ում հետ է Սասուն Միքայելյանը վաղը պահելու սահմանը:

Անի Սահակյան