Հաղորդում հանցագործության մասին. արդեն սորոսական Սաշիկ Սուլթանյանը հայերի ու եզդիների միջև թշնամանք է տարածում.Մալյան (video)

Հայելի ակումբում հրավիրված մամուլի ասուլիսին «ՎԵՏՕ» հասարակական-քաղաքական շարժման ղեկավար Նարեկ Մալյանը ներկայացրեց՝ ինչ իրավական գործընթացով պետք է կասեցվի «Բաց հասարակության հիմնադրամներ»-ի հայկական մասնաճյուղը:

Նրա խոսքով՝ Հայաստանում ապրող ազգությամբ եզդի Սաշիկ Սուլթանյանը, որը դեռևս 2018 թվականի մայիս ամսին, դիմելով նոր իշխանություններին, ասել է, որ եզդիներն ու հայերը ունեն եղբայրական հարաբերություններ և ավելի պետք է խորացնել այն, 2019-ին Սորոսի գրասենյակից գրանտ ստանալուց հետո լրիվ այլ հայտարարություններ է անում: Մալյանը պատմեց, որ վերջինս հարցազրույց է տվել Իրաքում գործող եզդիական լրատվամիջոցի և հայտարարել, թե եզդիների իրավունքները Հայաստանում պաշտպանված չեն, Հայաստանը չի կատարում իր ստանձնած միջազգային պարտավորություններն ազգային փոքրամասնությունների, այդ թվում` եզդիների իրավունքների պաշտպանության հարցում, Հայաստանում չի դասավանդվում եզդերենը, լեզուն Հայաստանում չունի առաջընթաց, միայն հետընթաց է ապրում, եզդիները Հայաստանում կորցնում են իրենց մշակույթը:

Նարեկ Մալյանը հավելեց. «Մեր պահանջն է լինելու ԱԱԾ-ից` ճշտել Սաշիկ Սուլթանյանի՝ «Սորոսի» գրասենյակի կողմից ստացած գրանտի իրական նպատակները, այդ հիմքի վրա մենք գնալու ենք «Հիմնադրամների մասին» օրենքով նրան, որ եթե հիմնադրամի գործունեությունը վնասում է հանրային առողջությունը, ազգամիջյան թշնամանք է հրահրում և այլ նման բացասական ներգործություն է ունենում հանրության վրա, այդ հիմնադրամը ենթակա է լուծարման օրենքի ուժով: Այսինքն՝ մենք գնալու ենք դեպի իրավական լուծարման»,- ասաց նա: