Կյանքն առանց արտակարգ դրության. ինչ է նախատեսում իշխանությունը

Սեպտեմբերի 4-ին Ազգային ժողովն արտահերթ նիստ է հրավիրել՝ օրակարգում ունենալով մի շարք օրենքներում փոփոխություններ եւ լրացումներ կատարելու օրենսդրական փաթեթ: Խոսքն արտակարգ դրության մասին ՀՀ օրենքի փոխարեն կիրառվող համալիր օրենքների մասին է:

Սեպտեմբերի 11-ից արտակարգ դրությունն այլեւս չի երկարաձգվի եւ համավարակի դեմ պայքարը հնարավոր կլինի իրականացնել գործող օրենսդրությամբ, բնականաբար, կատարվելիք փոփոխություններով հանդերձ: Այսպիսով, շատերին հետաքրքրում ՝ ինչ է սպասվում արտակարգ դրությունը հանելուց հետո, մարդիկ շարունակելու են դիմակ կրել, հնարավոր լինելու է զանգվածային խնջույքներ կազմակերպել, կամ ասենք կարող են մի օր մեկուսացնել կամ ինքնամեկուսացում պարտադրել: Այս բոլոր հարցերի պատասխանները կարող ենք գտնել փոփոխությունների փաթեթում: Եթե հակիրճ ներկայացնենք, ապա առաջարկվող փոփոխությունները հնարավորություն են տալու կառավարությանը կիրառել բոլոր այն սահմանափակումները, որոնք կիրառել են արտակարգ դրության անցած հինգ ամիսների ընթացքում: Ինքնամեկուսացում, մեկուսացումից սկսած վերջացրած անհատական պաշտպանական միջոցների կիրառմամբ:

Արտակարգ դրության փոխարեն կհայտարարվի կարանտին.<< Վարակիչ հիվանդությունների` Հայաստանի Հանրապետության տարածք ներբերման (ներթափանցման), դրանց ծագման ու տարածման վտանգի, բռնկումների, համաճարակների առաջացման, ինչպես նաև դրանց հետևանքով արտակարգ իրավիճակ առաջանալու դեպքերում կարող է սահմանվել կարանտին: Կարանտինը վարակիչ հիվանդությունների բռնկումները, համաճարակները տեղայնացնող, վերացնող, վարակի օջախները մեկուսացնող և վարակի հետագա տարածումը, վարակիչ հիվանդությունների ներբերումը (ներթափանցումը) կանխող ռեժիմ է, որը սահմանվում է Հայաստանի Հանրապպտության ամբողջ տարածքում կամ դրա առանձին տարածքներում (հասցեներում)>>: Կարանտին սահմանվելու դեպքում կիրառվող սահմանափակող միջոցառումներ են սահմանվել
․ 1) համաճարակի (կարանտինային) գոտում մուտքի և ելքի հատուկ ռեժիմի սահմանում. 2) «Պետական սահմանի մասին» օրենքի 16-րդ հոդվածով նախատեսված պետական սահմանով հաղորդակցության ժամանակավոր դադարեցում կամ սահմանափակում. 3) անձանց ազատ տեղաշարժվելու իրավունքի և տրանսպորտային միջոցների տեղաշարժման սահմանափակումներ. 4) օբսերվացիա. 5) ինքնամեկուսացում. 6) մեկուսացում:
Սույն հոդվածով սահմանված միջոցառումների կիրառումը չի կարող խոչընդոտել Ազգային ժողովի, Սահմանադրական դատարանի, դատարանների, Մարդու իրավունքների պաշտպանի, զինված ուժերի, ոստիկանության զորքերի և սահմանապահ զորքերի բնականոն գործունեությունը: 5. Արտակարգ իրավիճակ առաջացնող համաճարակով պայմանավորված կարանտին սահմանվելու դեպքում բնակչության պաշտպանությունը, կիրառվող այլ միջոցառումների ցանկը, այդ միջոցառումների կազմակերպման և իրականացման կարգն ու առանձնահատկությունները սահմանվում են «Արտակարգ իրավիճակներում բնակչության պաշտպանության մասին» օրենքով, ինչպես նաեւ լիազոր մարմնի ղեկավարի որոշումներով, որոնք կիրառելի կդառնան ենթաօրենսդրական ակտերով:
Կարանտինը սահմանվում է վեց ամիս ժամկետով եւ այն կարող է երկարաձգվել, եթե սահմանման համար ծառայած հիմքը չի վերացել:

Անի Սահակյան