Իշխանության նոր արկածախնդրությունը, ովքեր են վտանգի տակ

Կառավարության կողմից անհետաձգելի ճանաչված աղմկահարույց նախագիծը ընդգրկվել է մշտական հանձնաժողովի օրակարգ։ Սեպտեմբերի 14-ին մեկնարկող աշնանային նստաշրջանին ընդառաջ սեպտեմբերի 3-ին ԱԺ պետաիրավական մշտական հանձնաժողովի նիստում կքննարկվի «Արտակարգ դրության իրավական ռեժիմի մասին» Հայաստանի Հանրապետության օրենքում լրացումներ կատարելու մասին եւ Վարչական իրավախախտումների վերաբերյալ Հայաստանի Հանրապետության օրենսգրքում լրացումներ կատարելու մասին օրենքների նախագծերի փաթեթը: Ավելի պարզ ասած՝ արտակարգ դրության ժամանակ հիվանդանոցները անկախ սեփականության ձեւից միասնական կառավարման հանձնելու մասին նախագիծն է։ Կառավարիչ է ընտրված առողջապահության նախարարության լիազոր մարմինը։ Իսկ հրամանները կամ հանձնարարականները չկատարելն առաջացնելու է տուգանքի նշանակում՝ 300-500 հազար դրամի չափով:

Նախագծերի փաթեթը կառավարության կողմից անհետաձգելի էր համարվել եւ ընդունվել դեռ հուլիսի 9-ին, բայց ԱԺ-ն արձակուրդ գնաց եւ երբ հայտարարվեց, որ արտակարգ դրության ռեժիմն այլեւս չի երկարացվի, թվում էր, թե նախագիծն այլեւս օրակարգ չի բերվի։
Նախ` նկատենք, որ այդ նախագծով առաջարկվում է սահմանել, որ արտակարգ դրության ժամանակ բժշկական հաստատությունների կառավարման լիազորություններն անցնելու են Առողջապահության նախարարությանը, իսկ հրամանները կամ հանձնարարականները չկատարելն առաջացնելու է տուգանքի նշանակում՝ 300-500 հազար դրամի չափով: Նկատենք, որ բավականին լայն լիազորություններ է տրվելու լիազոր մարմնին, զորօրինակ «կադրային ռեսուրսների, բժշկական գույքի, մահճակալային ֆոնդի, բժշկական նշանակության ապրանքների, տեխնիկական եւ հարակից միջոցների, շարժական գույքի եւ բժշկական օգնության տնօրինում,ինչպես նաեւ սպասարկում իրականացնող կազմակերպությունների բնականոն աշխատանքն ապահովող օժանդակ միջոցների եւ այլնի։

Տեղեկությունների համաձայն հիվանդանոցի սեփականատերերը դեմ են այս փոփոխությանը, նրանք չգիտեն՝ եթե ստիպված լինեն թեկուզ ժամանակավոր իրենց հիվանդանոցները հանձնել պետական կառավարման, ապա ինչ են հետ ստանալու։ Խնդիրն այն է, որ այս իշխանությունները եւ հատկապես առողջապահության ոլորտի պատասխանատուն ցույց են տվել իրենց կառավարչական հմտությունները, ավելի ճիշտ դրանց չգոյությունը։ Կորոնավիրուսային վեց ամիսների ընթացքում այս մարդիկ ամեն ինչ այնքան ձախողեցինք, որ տարածաշրջանում, ինչու ոչ աշխարհում բացասական ցուցանիշներով առաջին հորիզոնականներն ենք զբաղեցնում։ Այսքանից հետո գալ ու տնօրինել ուրիշների սեփականությունը , լի է արկածախնդրությամբ եւ մեծ վտանգներով։

Անի Սահակյան