Անհանգիստ նոպաներ, գողականից մինչեւ դատական գործեր․ իշխանությունում խառն են

Այսօր Հայաստանում կատարվող բոլոր գործընթացները պտտվում են իշխանությունը պահելու առանցքի շուրջ: Գրեթե չկա մի այնպիսի գործողություն, որը կզարգանա բնականոն հունով՝ սկսած նախարարների պաշտոնանկության հարցից, վերջացրած դատական պրոցեսներ: Իշխանության քայլերը թերեւս պայմանավորված են ընդդիմադիր դաշտում ընթացող շարժերով: Հատկապես վերջին ժամանակներս ընդդիմադիր թեւում մեծ աժիոտաժ է, մամուլը գրում է մոբիլիզացվելու, առկա դժգոհությունները համախմբելու եւ մեծ ալիք բարձրացնելու մասին:

Ակտիվ են ՀՅԴ-Ծառուկյան-Վանեցյան եռյակը, Սերժ Սարգսյանը իր ՀՀԿ-ով, Ռոբերտ Քոչարյանը: Չի բացառվում, որ նրանք փողոցային պայքար սկսեն, որի դեմ առնելը բավական դժվար է լինելու: Պատահական չէ, որ, ըստ տեղեկությունների, իշխանությունը իր մարզային պատգամավորներին օրերս պատվիրակել է շրջել իրենց համայնքներում, լսել մարդկանց, լուծում տալ դժգոհություններին:  Թվում էր, թե Արսեն Թորոսյանի եւ քաղաքապետ Հայկ Մարությանի պաշտոնանկությունն օրերի հարց էր, գործընթացներն ու այս պաշտոնյաների վարքը հուշում էր, որ Նիկոլ Փաշինյանին այլընտրանք չի մնում, նա ուր որ է կազատի նարնց՝ անսալով ոչ միայն հանրային դժգոհություններն, այլեւ թիմի ներսում կուտակվածը, բայց անսպասելի շրջադարձ եղավ երկուսի դեպքում էլ: Կարելի է ենթադրել, որ իշխանությունը իր համար ոչ այնքան նախանձելի փուլում չի ուզում ճաքեր առաջացնել, որոնք ավելի կդյուրացնեն այն քանդելու պրոցեսը: Հիմա դրա ժամանակը չէ, այլ միասնական եւ ուժեղ թիմ դրսեւորելու պատրանքներ են պետք: Թեեւ դա էլ չի ստացվում եւ Նիկոլ Փաշինյանի գերնյարդային վիճակները երբեմն բացահայտ են դառնում կառավարության նիստերին, իսկ դրանց կուլիսային դրսեւորումների մասին լեգենդներ են պտտվում:

Հեշտ չէ կառավարել մի իրավիճակում, երբ տնտեսական զրո ակտիվությանը զուգահեռ կորոնավիրուսային պատերազմն է ու արտաքին աշխարհի հետ ոչ բարենպաստ հարաբերություններ, ռուսական կողմի ճնշումներ… Նիկոլ Փաշինյանի վերջին հույսը մնացել է ՀՔԾ-ն, որով նա իրականացնում է նախկինների դեմ պայքարը, լրացնոմ քրեական գործերը, նոր գործեր են կարվում:

Ուստի դատական գործընեացները նույնպես պետք է դիտարկել ներքաղաքական տիրույթում: Դատարանը կալանքի տակ թողեց նախկին իշխանության ամենաազդեցիկ նեկայացուցիչներից ֆինանսների նախկին նախարար Գագիկ Խաչատրյանին ու եղբորորդուն, թեեւ նրա պաշտպանական խմբի միջնորդությանը եւ հիմքերի: Պետք չէր ակնկալել, որ այս փուլում իշխանությունը կուժեղացնի նախկինների թիմը, ճիշտ հակառակը տեղեկություններ կան, որ առաջիկայում նոր <<խոշոր գլուխներ>> են անազատության մեջ հայտնվելու, որպեսզի ներքաղաքական գործընթացներին մասնակցություն չունենան:

Հասել են նաեւ գողական աշխարհին, օրենքով գողեր են ձերբակալվում, բերման են ենթարկվում, իշխանությունը նրանց պահում է իր հսկողության տակ:

Անի Սահակյան