Բռնապետական խաղեր. ՍԴ-ի հարցում Փաշինյանը փրփուրներից է կախվում
Կառավարության, այն է՝ Նիկոլ Փաշինյանի առաջադրած Սահմանադրական դատարանի դատավորի թեկնածու Վահրամ Ավետիսյանը հրաժարվում է ՍԴ դատավորի թեկնածությունից եւ ինքնաբացարկ հայտնում:
Նրա առաջադրումն իսկզբանե սվիններով ընդունվեց ոչ միայն հանրության ակտիվ շերտերի կողմից, այլեւ հենց իշխանության ներսում: Նա Սերժ Սարգսյանի պաշտոնավարման ընթացքում դատական համակարգի կարկառուն ներկայացուցիչ, Վճռաբեկ դատարանի քրեական պալատի նախագահ Դավիթ Ավետիսյանի որդին է: Հենց այս հանգամանքն էր բուռն վրդովմունքի պատճառ դարձել:
Մի քանի շաբաթ է` մամուլը գրում էր Իմ Քայլում իշխող տրամադրությունների մասին, ինչպես նաեւ թեկնածուի հետ հանդիպման մանրամասներ սպրդվեցին՝ տպավորություն ստեղծելով, որ պատգամավորները խորը ընդվզել են Նիկոլ Փաշինյանի որոշման դեմ եւ որոշել, որ չեն ընտրելու Վահրամ Ավետիսյանին, ում հայրը մասնակցել է նաեւ մարտիմեկյան գործով կայացրած դատավճիռներին, այդ թվում՝ Նիկոլ Փաշինյանի:
Թեկնածուն իր ինքնաբացարկը նույնպես պայմանավորում է իշխող ֆրակցիայի հետ հանդիպումով. ««Իմ քայլը» խմբակցության պատգամավորների հետ հանդիպումից և հետագա քննարկումներից ինձ համար ակնհայտ դարձավ, որ պատգամավորների մի մասի՝ Սահմանադրական դատարանի դերակատարության, Սահմանադրական դատարանի դատավորի ապաքաղաքականացվածության և անկախության վերաբերյալ մոտեցումներն ու պատկերացումներն իմ մոտեցումներին և պատկերացումներին համահունչ չեն, իսկ որոշ դեպքերում նաև ինձ համար անընդունելի։
Հետևաբար, նման իրավիճակում Ազգային ժողովում 80 ձայն ստանալը համարում եմ անիրատեսական, իսկ Սահմանադրական դատարանի դատավորի պաշտոնում ընտրվելու հետագա գործընթացին մասնակցելը՝ աննպատակահարմար»:
Մենք ավելի վաղ տեղեկացրել էինք, որ Ավետիսյանի թեկնածության մասին Նիկոլ Փաշինյանին խորհուրդ է տվել իր խորհրդական Աննա Վարդապետյանը, ով ժամանակին Վահրամ Ավետիսյանի հոր օգնականն է եղել:
Ինչն էր իրականում Ավետիսյանի ինքնաբացարկի պատճառը:
Հետաքրքրական է, որ նա կառավարության, այսինքն վարչապետ Նիկոլ Փաշինյանի թեկնածուն էր, ինչը նշանակում էր, որ նրա ՍԴ դատավոր դառնալու համար, առնվազն 88 ձայն ապահովված էր։ Նիկոլ Փաշինյանը կարող էր մի հանդիպումով բոլորին իրենց տեղը նստեցնել եւ հրահանգել չթռնել իր գլխից ու ՍԴ գործուղել իր թեկնածուին: Բայց քանի որ Նիկոլ Փաշինյանը այլեւս բռնապետի տիտղոսակիր է եւ նրա ու իմքայլականների փոխհարաբերությունների մասին լեգենդներ են պտտվում, որ Փաշինյանը գերազանցում է պետության բոլոր նախկին ղեկավարներին, թիմի հետ հանդիպումների ժամանակ օդը կանգնում է, ուստի ճիշտ ժամանակն էր օգտվել առիթից եւ մի քիչ դեմոկրատիա խաղալ՝ ցույց տալով, որ ներիշխանական իրական դեմոկրատիա կա:
«Իմ քայլի» պատգամավորները, ցուցադրելու համար, իբր իրենց ինքնուրույնությունը, Վահրամ Ավետիսյանին նախ փակ հանդիպման հրավիրեցին, ապա ինֆորմացիա սպրդվեց, թե նրա բմբուլները քամուն են տվել, եւ վերջում էլ քցեցին թեկնածուին:
Անի Սահակյան
Հետևեք մեզ Viber-ում
