Ընդդիմության դեմ նոր զենք կկիրառեն

Ըստ տեղեկությունների՝ Իմ Քայլը նախաձեռնում է փոփոխություններ իրականացնել Ազգային ժողովի կանոնակարգ-օրենքում, որպեսզի խորհրդարանում մշտական հանձնաժովների թիվը եւս մեկով ավելանա եւ գործի էթիկայի մշտական հանձնաժողով: Գործող կանոնակարգի համաձայն՝ էթիկայի հանձնաժողովը ժամանակավոր է ու ստեղծվում է կոնկրետ դեպքի համար: Հանձնաժողովը մշտական դարձնելու հացը ծագել է վերջերս՝ ԲՀԿ-ի դեմ պայքարի շրջանակներում, մասնավորապես, Նաիրա Զոհրաբյանի եւ Գեւորգ Պետրոսյանի հետ կապված հայտնի միջադեպերից հետո։ Նրանք հայհոյախառն հաղորդագրություններ էին ստացել եւ պատասխանել վիրավորական լեքսիկոնով։ Նրանց զրույցնեերի ձայնագրությունը հայտնվեց համացանցում, հասկանալի է, որ իշխանությունը հատուկ ծառայություններին հրահանգել էր քչփորել պատգամավորների անձնական կյանքն ու տվյալները:

Դրանից հետո նրանց նկատմամբ արշավ սկսվեց՝ մանդատը վայր դնելու պահանջով: Ֆլեշմոբի մասնակիցները հիմնականում կառավարության տեղեկատվական ՊՈԱԿ-ի ֆեյքաբաֆրիկայի կոնտինգենտն է եւ արտասահմանի որոշ հայրենակիցներ, որոնք ակնհայտորեն հրահանգվում են ինչ որ կենտրոնից: Դատելով իշխանությունում առկա տրամադրություններից, որոշել են գործընթացը, իսկապես, խորացնել, պատգամավորներին գամել անարգանքի սյունին եւ պարտադրել վայր դնել մանդատը:

Էթիկայի հանձնաժողովը, ըստ տեղեկությունների, ստեղծվում է առհասարակ ընդդիմադիր պատգամավորների դեմ: Որպեսզի ակնհայտ ցույց չտան, որ որեւիցե պատգամավորի հարցով հանձնաժողով են ստեղծում, այն մշտապես կգործի:
Որ այն ստեղծվելու է ընդդիմադիրների դեմ, կարելի է չկասկածել, հակառակ պարագայում անցած երկու տարիների ընթացքում եղել են բազում դեպքեր նման հանձնաժողով ստեղծելու, ինչից իշխող ուժը զերծ է մնացել:

Ինչպես հայտնի է, իմքայլական երկու պատգամավորներ՝ Կարեն Սարուխանյանն ու Սոֆիա Հովսեփյանը ինչ-որ մի շրջան պարբերաբար բանավիճում էին միմյանց հետ, Սարուխանյանը վիրավորել էր կին պատգամավորին՝ ասելով՝ «ամուսնացիր՝ կանցնի», հետո ներողություն խնդրել: Սոֆիա Հովսեփյան ասել էր, որ Սարուխանյանի պահվածքը վարչության նիստում քննարկել են, նաեւ խմբակցության նիստում են քննարկելու, բայց այդպես էլ չքննվեց պատգամավորի վարքը:

Ազգային կոռուպցիոն խորհուրդն էր դիմել խորհրդարան՝ պատգամավոր Արման Բաբաջանյանի վարքը քննարկելու համար էթիկայի հանձնաժողով ստեղծելու հարցով: Խորհուրդն ուսումնասիրության էր ենթարկել 2020 թվականի փետրվարի 6-ին www.politik.am կայքի` «Տեսանյութ. Արման Բաբաջանյանը սեռական բնույթի հայհոյանքներ է տվել քաղաքացուն. պատգամավորը ստում է» վերտառությամբ հրապարակումը, որից պարզ է դառնում, որ Ազգային ժողովի անկախ պատգամավորը «Ֆեյսբուք» սոցիալական ցանցում անձնական նամակագրության ժամանակ հայհոյել և անպարկեշտ խոսքեր է ուղղել քաղաքացի Մարիամ Կիրակոսյանին:

Ավելի ուշ, երբ Մարիամ Կիրակոսյանը բարձրաձայնել է տեղի ունեցածի մասին և հրապարակել նամակագրությունը` քննադատելով պատգամավորին անհարիր պահվածքի համար, Բաբաջանյանը ոչ միայն չի փորձել խնդիրը հարթել, այլև հակառակը, ստի միջոցով փորձել է մանևրել` հայտարարելով, թե հրապարակված նամակագրության հետ ինքը որևէ առնչություն չունի:
Խորհուրդն իր ուսումնասիրության արդյունքում փաստում էր, որ հրապարակված նամակագրությունը իրական է, և պատգամավորի կողմից թույլ է տրվել ԱԺ պատգամավորի էթիկայի նորմերի նկատմամբ օրենսդրության կոպտագույն խախտում: Սակայն այս դեպքում էլ իշխանությունը փուռը չտվեց յուրային պատգամավորին: Նույն խորհուրդը դիմել էր նաեւ ԱԺ փոխնախագահ Ալեն Սիմոնյանի հարցով «Ազգային հակակոռուպցիոն խորհուրդն ուսումնասիրություն է կատարել ֆեյսբուքյան օգտատեր Նանե Արզումանյանի գրառման կապակցությամբ և արձանագրել, որ Ալեն Սիմոնյանը, ցուցաբերելով անհանդուրժողականություն քաղաքական այլ հայացքներ կրող քաղաքացու նկատմամբ, նրան հրապարակայնորեն վիրավորել է: Մասնավորապես, Նանե Արզումանյանի գրառման ներքո, որտեղ քաղաքացին քննադատել է Ալեն Սիմոնյանին և նրա վարքը ԱԺ-ում, վերջինս, մեկնաբանությունների բաժնում, դիմելով իր համակիրներին, գրել է. «Շան տեղ մի դիր, մեր զրուցակիցը իրանք չեն»:

Բայց այս անգամ էլ Իմ Քայլը ձեռնպահ մնաց: Հետեւաբար, Իմ Քայլի այսօրվա նախաձեռնողականությունը ոչ այլ ինչ է, քան հետապնդում ընդդիմության նկատմամբ:

Անի Սահակյան