Կրուտիտի նոր խմբաքանակ Մարուքյանից

Քվորում չլինելու պատճառով երեկ առավոտյան նշանակված Սահմանադրական դատարանի նիստը չկայացավ: Օրակարգում, ի թիվս այլ հարցերի, երկրորդ նախագահ Ռոբերտ Քոչարյանի գործին առնչվող հարցի քննություն էր: Քոչարյանը և առաջին ատյանի դատարանի դատավոր Դավիթ Գրիգորյանը դեռ անցած տարվանից դիմելով ՍԴ՝ խնդրել են որոշել Քոչարյանին մեղսագրվող 300.1 հոդվածի սահմանադրականության հարցը:

Սահմանադրական դատարանում քվորումի խնդիր կա, քանի որ հունիսի 26-ին ուժի մեջ են մտել իշխանության վերջերս ընդունած սահմանադրական փոփոխությունները, համաձայն որոնց՝ դադարեցվել են ՍԴ 9 դատավորներից 3-ի՝ Ալվինա Գյուլումյանի, Ֆելիքս Թոխյանի ու Հրանտ Նազարյանի լիազորությունները: Իսկ այլևս միայն ՍԴ դատավորի կարգավիճակ ունեցող Հրայր Թովմասյանը և Արևիկ Պետրոսյանը արձակուրդում են:

Վերջին երկուսը արձակուրդից կարող են վերադառնալ, սակայն, ըստ ամենայնի, ՍԴ-ում սպասում են ՄԻԵԴ-ի միջանկյալ կարծիքին: Ալվինա Գյուլումյանը, Ֆելիքս Թոխյանը, Հրանտ Նազարյանը, որոնց լիազորությունները դադարեցվել են, իրենց խախտված իրավունքների վերականգնման համար, ինչպես հայտնի է, դիմել են Մարդու իրավունքների եվրոպական դատարան։ ՄԻԵԴ է դիմել նաեւ Հրայր Թովմասյանը, ով զրկվել է ՍԴ նախագահի պաշտոնից։ Նրանք դատարանին խնդրել են կիրառել հայցի միջանկյալ միջոց, որը կիրառվում է «անհետաձգելի դեպքերում»։ Այն վերջնական որոշում չէ, բայց թույլ չի տալիս տվյալ պետության իշխանություններին մինչեւ դատարանի վճռի կայացումը կտրուկ քայլեր կատարել, ՍԴ դատավորների դեպքում, եթե միջանկյալ միջոց կիրառվի, նրանք կշարունակեն պաշտոնավարել, մինչեւ ՄԻԵԴ-ն իրենց հայցով որոշում կայացնի։

Ըստ տեղեկությունների՝ մինչեւ ուրբաթ հայտնի կդառնա ՄԻԵԴ-ի որոշումը, որը նաեւ կլինի քաղաքակկան գնահատական հայաստանյան իշխանությունների ապօրինի գործողություններին, բայց հաշվի առնելով այս իշխանությունների վարքագիծը, չի բացառվում, որ նրանք ցանկացած որոշման պարագայում շարունակեն ՍԴ-ի նկատմամբ իրենց խաչակրաց արշավանքները եւ ՍԴ թափուր պաշտոնները համալրեն յուրայիններով: Սակայն այդ որոշումը միանշանակորեն կանաչ լույս է վառելու դատավորների առջեւ եւ լեգիտիմացնելու է նրանց գործողությունները:

Տեղեկություններ կան, որ ՄԻԵԴ վճռին են սպասում նաեւ Լուսավոր Հայաստան կուսակցությունում:

ՍԴ-ի ու Սահմանադրության դեմ իշխանական արշավի ու հակասահմանադրական ճանապարհով սահմանադրական փոփոխությունների ընդունման կապակցությամբ ինչպես հայտնի է ԲՀԿ-ն ստորագրություններ հավաքեց եւ դիմել է ՍԴ: Մարուքյանը, սակայն, իր կուսակցությամբ չմիացավ ԲՀԿ-ի նախաձեռնությանը՝ պատճառաբանելով, թե Քոչարյանի հարցը քննելուց՝ հուլիսի 7-ից հետո իրենք կդիմեն ՍԴ: Իսկ երբ Քոչարյանի թիմը հայտարարեց, թե ետ են վերցրել դիմումը, Մարուքյանը սկսեց լոլոներ կարդալ ու դարձյալ չմիացավ ստորագրահավաքին: ԼՀԿ-ական Մանե Թանդիլյանն էլ իշխանահաճո թվաբանական հաշվարկ էր արել ու «բացահայտել», թե ՍԴ դիմելու համար ստորագրությունների թիվը բավարար չէ՝ 26-ի փոխարեն 27 պետք է լինի: Հուլիսի 7-ն այլեւս անցյալում է, սակայն Մարուքյանը կրկին հրաժարվում է միանալ ԲՀԿ-ի  նախաձեռնությանը՝ ասելով, որ խնդիրը ոչ թե այդ ամսաթիվն էր, այլ Քոչարյանի գործը:

Մինչդեռ ՍԴ դիմելու համար օրենքը եռամսյա ժամկետ է նախատեսում եւ լուսավորյալները հետաքրքիր է ինչ են անելու, եթե մի երեք ամիս ՍԴ-ն նիստեր չգումարի ու Քոչարյանի գործը չքննի: Թույլ են տալու, որ Հայաստանում իշխանությունը բռնապետություն հաստատի, որի համար են արվում այս քայլերը՝ նախ Սահմանադրությունը բռնաբարվեց, ապա ՍԴ-ն կկազմաքանդեն, հետո ինչ ուզենան, ինչ օրենք ցանկանան ընդունել, կանեն:

Անի Սահակայն