Կարապի երգը. Իմ Քայլը գնում է ՀՀԿ-ի հետեւից

ԲՀԿ ղեկավար Գագիկ Ծառուկյանին պատգամավորական անձեռմխելիությունից զրկելու որոշումից հետո իշխանության քարոզչամեքենաները ցնծության մեջ են. դատախազի միջնորդությունը գրեթե միաձայն հավանության արժանացավ Իմ Քայլի կողմից: 88 հոգանոց իշխանական ֆրակցիան բացառությամբ Սասուն Միքայելյանի եւ Թագուհի Թովմասյանի կողմ քվեարկեց որոշմանը: Թագուհի Թովմասյանը ֆիզարձակուրդի մեջ է, իսկ Սասուն Միքայելյանը ընդհանրապես չէր ներկայացել նիստին: Այս քվեարկությունից հետո ոգեւորված արձանագրում են, թե իշխող ուժի պառակտման, թեւերի մասին լուրերը սին էին, մամուլի միջոցով տարածվող իբր բամբասանք եւ ապացույցն էլ կուռ ու միասնական քվեարկությունն է:

Որ իշխանությունում Ծառուկյանին անձեռմխելիությունից զրկելու որոշումը բոլորը չեն ընդունել ծափողջուններով, այդ մասին շատերին է հայտնի, ընդդիմացողների թվում ոչ միայն Սասուն Միքայելյանն է, այլեւ ԱԺ նախագահ Արարատ Միրզոյանը իր թիմով: Եթե Սասուն Միքայելյանը հեղափոխությունից հետո հասցրել է մարդկային ջերմ հարաբերություններ հաստատել Ծառուկյանի հետ, բացի այդ, նա քաղաքական մեծ ճանապարհ է անցել եւ հասկանում է, որ իշխանության վախճանն այս տեմպերով մոտ է, ապա Արարատ Միրզոյանի՝ Ծառուկյանի նկատմամբ վերապահումները բխում են սեփական քաղաքական ամբիցիաներից: Ինչպես հայտնի է նա պլաններ ունի, թիմ է հավաքագրում եւ իրեն է պատկերացնում Փաշինյանի փոխարինող, իսկ այդ ճանապարհին չի ուզում հարաբերություններ փչացնել ընդդիմադիր դաշտի հետ:

Հասկանալի է, թե բարոյահոգեբանական ինչպիսի ճնշում է գործադրվել Իմ Քայլի պատգամավորների նկատմամբ, տարբեր տեղեկություններ էին հասնում, որ Նիկոլ Փաշինյանը ուղիղ իմաստով սպառնացել է բոլորին, ասել՝ ոչ մեկ չի պրծնելու, միայն բախտը փորձի եւ չկատարի իր որոշումը եւ կողմ չքվեարկի ներկայացված որոշմանը: Այդուհանդերձ, իշխող ուժին եւ, մասնավորապես, Նիկոլ Փաշինյանին բարեկամաբար խորհուրդ կտանք շատ չոգեւորվել իրենց թվացյալ մասնականությամբ եւ հերոսական հայտարարություններ չանեն, հիշեն, որ 2018 թվականի թավշյա հեղափոխությունից բառացիորեն շաբաթներ առաջ նույն պատկերն էր նաեւ Հանրապետական կուսակցությունում, բոլորն ինքնավստահ եւ միակամ պնդում էին, թե իրենք կուռ են, իշխանությունն ամուր, դիրքերն անսասան, թե ինչ եղավ հետո, շատ հուզիչ էր: Իշխանությունն այդպիսի բան է, եթե վարչապետական դիրքը թույլ է տալիս ճնշում գործադրել, սպառնալ, դա դեռ չի նշանակում, որ տիրապետում ես իրավիճակին: Եթե կուզեք՝ հիշեք Լեւոն Տեր-Պետրոսյանի ժամանակները, թե ինչպես երկրապահը մեկ գիշերվա մեջ քանդվեց, այսինքն այսօրվա վիճակը դեռ հաղթարշավի մասին չի խոսում, հատկապես, երբ այս օրերին ընդդիմադիր դաշտում բուռն կոնսոլիդացիա է ընթանում, պրոցեսներ են գեներացվում:

Ծառուկյանին անձեռմխելիությունից զրկելու ԱԺ նիստի ընթացքն արդեն իսկ արտացոլում էր, թե ինչպիսի տրամադրություններ կան իրականում իշխանության ներսում: ԱԺ նախագահը գրեթե բաց տեքստով խոստովանեց, որ Ծառուկյանի նկատմամբ քաղաքական հետապնդում է իրականացվում, «Հեշտ է հանդես գալ կառավարության հրաժարականի պահանջով, երբ հարուցված են իրավական գործեր, որոնք կարող են հանգեցնել քո մասնակցությանը դրանց։ Ականջահաճո՞ է մեզ համար, որ որևէ մեկը պահանջում է իշխանության հրաժարականը։ Ոչ։ Բայց դրա իրավունքն ունի յուրաքանչյուրը»,–ասաց Միրզոյանը: Ասել կուզի՝ իշխանությունը խիստ նեղվել է Ծառուկյանի՝ իշխանության հրաժարականի պահանջից: Միրզոյանն իր խոսքն ամփոփեց` ասելով, որ որևէ մեկը մյուսին թող ոչնչով չսպառնա. ամեն ինչ արվելու է օրենքի շրջանակում։ Եթե բացենք փակագծերը՝ ԱԺ նախագահը բաց տեքստով ասաց՝ Ծառուկյանը իշխանությանն է սպառնացել, իշխանությունն էլ իր քայլերով Ծառուկյանին է վախեցնում:

Անի Սահակյան