Եվրասիական տնտեսական միությունը շարունակելու է ամրանալ և զարգանալ

Ռուսաստանի Դաշնության նախագահ Վլադիմիր Պուտինը հույս ունի, որ Եվրասիական տնտեսական միությունը շարունակելու է ամրանալ և զարգանալ ի բարօրություն անդամ երկրների ժողովուրդների: Այս մասին Բիշքեկում Եվրասիական տնտեսական բարձրագույն խորհրդի նիստին հայտարարեց Վլադիմիր Պուտինը` կարծիք հայտնելով, որ նման լավատեսության համար կան բոլոր հիմքերը: ՌԴ նախագահն իր ելույթում մատնանշեց Միության գրանցած արդյունքները, խոսեց հաջողությունների և խնդիրների մասին: Նրա ներկայացմամբ` այս տարվա հունվարին նախորդ տարվա հունվարի համեմատ ԵԱՏՄ անդամ երկրների միջև փոխադարձ առևտրի ծավալն ավելացել է 38 տոկոսով, իսկ ԵԱՏՄ պետությունների՝ երրորդ երկրներ մատակարարումներն ավելացել են 37 տոկոսով: «Զգալի բարելավվել է արտահանման և ներմուծման կառուցվածքը: 2016 թվականին ԵԱՏՄ­-ում գյուղատնտեսության ոլորտում գրանցվել է 4 տոկոս աճ: Ավելացել է նաև արդյունաբերությունում աճը: Այս ոլորտների դրական դինամիկա ենք կանխատեսում նաև ընթացիկ տարում: Հայաստանի և Ռուսաստանի միջև գյուղատնտեսական ապրանքների առևտրաշրջանառությունն ավելացել է, ընդ որում զգալի չափով` 22 տոկոսով: Միության շուկայի շնորհիվ Ղազախստանում զարգանում է նոր ոլորտ` մեքենաշինություն: Ղրղզստանում ստեղծվում են տեքստիլ արդյունաբերության զարգացման համար նպաստավոր պայմաններ: 2016 թվականին ղրղզական թեթև արդյունաբերական ապրանքների արտահանումը Միության շուկա ավելացել է 38 տոկոսով: Բելառուսում արտադրված մի շարք ապրանքատեսակներ ՌԴ­ի շուկայում դիտվում են, որպես տեղական արտադրանք և օգտվում են արտոնություններից ՌԴ պետական գնումներին մասնակցելիս»,­- ասաց Պուտինը: