Անուշ Սեդրակյանը չի բացառում, որ սեփական կուսակցություն կհիմնի. «Քաղաքակրթություն»
«Հայկական ժամանակ» թերթը գրում է. «Ազատ դեմոկրատներ» կուսակցությունից վերջերս հեռացած Անուշ Սեդրակյանը չի բացառում, որ 2017 թվականի խորհրդարանական ընտրություններից հետո սեփական կուսակցություն կհիմնի: Մինչ այդ, ասում է, ժամանակ կա, և ինքը կարող է հանգիստ կշռադատել անելիքները՝ միաժամանակ հետևելով քաղաքական դաշտի զարգացումներին: Մեզ հետ զրույցում նա բացառեց, որ նոր կուսակցությունը կբացվի մինև 2017-ի ապրիլ: «Եթե հնարավորություն ունենայի՝ ես ինքս կստեղծեի հասարակական-կուսակցական միավորում, որը կարճ կանվանեի «Քաղաքակրթություն»: Անուշ Սեդրակյանի համոզմամբ՝ Հայաստանի կուսակցաշինության համակարգն այժմ շատ հեռու է կատարյալ լինելուց և թերի շատ կողմեր ունի: «Ինձ թվում է՝ կուսակցաշինության համակարգը պետք է ստեղծվի գաղափարական ամուր հիմքի վրա: Իշխանափոխությունն ու իշխանությանը դեմ լինելը հասարակության ընդհանուր մտայնությունն է: Ես սա չեմ համարում ամուր գաղափարական հիմք: Կուսակցաշինության առանցքում ես չեմ տեսնում արևմտամետ կամ ռուսամետ արտահայտված թև: Ես չեմ տեսնում պետության տիպի ուրվագծումը, այն է՝ ինչ տիպի պետություն են մարդիկ ակնկալում՝ սոցիալական, կիսաավտորիտար, թե ռազմականացված՝ հաշվի առնելով մեր ծանր վիճակը»,- նկատեց նախկին կուսակցական գործիչը՝ միաժամանակ հավելելով՝ միակ կուսակցությունը, որին ինքը կանդամակցի, կլինի հստակ սոցիալական և գաղափարական հիմքով ստեղծված որևէ կուսակցություն»: Մանրամասները՝ թերթի այսօրվա համարում
Հետևեք մեզ Viber-ում
