Տարվա կարևոր իրադարձությունն ու փոփոխությունները

Հայելի ակումբում լրագրողների հետ հանդիպման ժամանակ, ամփոփելով տարին,  ԱԺ  ՀՅԴ խմբակցության քարտուղար Աղվան Վարդանյանն ասաց, թե 2016-ը համակարգային փոփոխության տարի էր: «Ընտրական նոր օրենսգրքի ընդունման առումով, տարին փոփոխությունների տարի էր՝ այն աշխուժություն մտցրեց քաղաքական դաշտում: Գիտակցելով, թե չգիտակցելով ԸՕ-ի դերը`մարդիկ տեսնում են, որ կա հնարավորություն ընտրությունների միջոցով Հայաստանում բան փոխել: Ուզում եմ շեշտել, որ այս համակարգային  փոփոխություններում Դաշնակցության դերակատարությունն էական է»,- ասաց Աղվան Վարդանյանը: Աղվան Վարդանյանն այս տարվա համար առանձնացրեց ևս մեկ կարևոր իրադարձություն՝ «Սասնա ծռերի» կողմից ՊՊԾ գնդի գրավումը. «Որքան էլ անկեղծ, հուսահատ լիներ այդ քայլը, ես կարծում եմ, որ դա ապրիլյան պատերազմի ընթացքում մեր ազգի համախմբվածությունը կոտրելուն էր ուղղված, որն ուղղորդվել է դրսի ուժերի կողմից»։ Անդրադառնալով ՀՀԿ-ՀՅԴ-ի քաղաքական համագործակցությանը`  նշեց, որ այդ համաձայնագրի հիմքում դրված են մեր երկրին հուզող ներքին ու արտաքին բոլոր խնդիրները: Խոսելով առաջիկա խորհրդարանական ընտրությունների մասին՝ ասաց. «Այս նոր համակարգի պայմաններում որքան մեծ լինի Դաշնակցության կշիռը,  ներկայացվածությունը խորհրդարանում, այնքան մեր երկրում ներքին կայունություն կապահովիի, զարգացման ռեալ նախադրյալներ կստեղծվեն, երշխավորված կլինի մեր երկրի, Արցախի անվտանգությունը, օտար միջամտությունները նվազ կլինեն կամ  հակազդեցություն կստանան։ Ուզում ենք, որ մեր քաղաքական ուժերը գիտակցեն, որ  Դաշնակցության պնդմամբ էր, որ Սահմանադրությամբ ամրապնդվեց, որ ընդդիմությունը պետք է խորհրդարանում ունենա տեղերի 30 տոկոսը, քանի որ մենք գիտակցում ենք, որ առանց ըննդիմության ռեալ ներկայացվածության, առանց հակազդեցության հնարավոր չէ երկիրը զարգացում ապրի»։