Գործարարների մոտ վախի մթնոլորտ կստեղծվի՞

Այսօր ՀՀ գյուղատնտեսության նախարար Իգնատի Առաքելյանի տարեվերջյան ամփոփիչ ասուլիսը տեղի ունեցավ «Արմենիա վայն» գործարանում: Ասուլիսի ընթացքում նախարարն անդրադարձավ  «Վինար» ընկերությանը պատասխանատվության ենթարկելուն: Ինչպես նշեց՝ «Վինար» ընկերությանը պատասխանատվության ենթարկելու նախաձեռնությունը բիզնես գործունեություն ծավալողների մոտ վախի մթնոլորտ չի ստեղծի: ««Վինար» ընկերությունը խաղողը մթերել է, գումարը չի վճարում: Կային ընկերություններ, որոնց հետ բանակցությունների միջոցով հասել են պարտքի մարմանը: «Վինարի» հետ մենք պայմանավորվեցինք, որ իր ունեցած սպիրտի համար գնորդ կգտնենք, բայց այդ վաճառվածի գումարը կվճարվի գյուղացիներին, չստացվեց»,- ասաց նախարարը: Անդրադառնալով ոլորտի խնդիրներին` Ի.Առաքելյանը նշեց, որ հանդիպել է ոլորտի ներկայացուցիչների հետ, քննարկել խնդիրները: Նրա խոսքով` այսօրվա ծրագրերը հաջորդ տարվա համար կատարելագործելու են, մշակվելու են մեխանիզմներ, որ կլինեն ի շահ ժողովրդի: «Պարարտանյութի սուբսիդավորման հարցում պետք է հասկանան` արդյոք շուկան պատրա՞ստ է ինքնակարգավորվել:Մեխանիզմ ենք մշակում և այն բոլոր ընկերությունները, որ պատրաստ են պարարտանյութի շուկա մտնել, գարնանը նրանք կգործեն: Միջանկյալ փուլ կլինի, մրցույթ կանցկացնենք և կընտրենք, որպեսզի գյուղացու համար ռիսկեր չլինեն»,- նշեց նախարարը: Նախարարը մյուս մթերողներին ևս հրավիրեց, որ եթե ուզում են օգնել խաղողագործությանը, պետք է նախապես հայտարարեն, թե ինչ են գնելու և ինչ գնով, իսկ եթե կանխատեսումը չկա, աշխատում են` չհասկանալով, թե ուր են գնում: Նշենք, որ 2015 թվականին խաղողի մթերումների համար գյուղացիների նկատմամբ չկատարված պարտավորություններ ունի թվով 6 ընկերություն, որոնցից 5-ը (Սիսավանի գինու գործարան, «Արենի վայն», «Մարան»,«Շատո Առնո», «Շահնազարյան») մինչև տարեվերջ պարտավորվել են մարել պարտքերը: