Գումարվել է ՀՀ Ազգային ժողովի արտահերթ նստաշրջան

ՀՀ ԱԺ նախագահ Գալուստ Սահակյանի որոշմամբ, ՀՀ Սահմանադրության 70-րդ հոդվածի համաձայն` ՀՀ կառավարության նախաձեռնությամբ դեկտեմբերի 22-ին գումարվել է ՀՀ Ազգային ժողովի արտահերթ նստաշրջան` նախաձեռնողի սահմանած օրակարգով:Խորհրդարանն ընդունել է արտահերթ նստաշրջանի անցկացման հատուկ ընթացակարգի մասին որոշումը եւ «Պետական տուրքի մասին» ՀՀ օրենքում փոփոխություն կատարելու մասին» օրենքի նախագծի քննարկման հատուկ կարգի մասին» ԱԺ որոշման նախագիծը, համաձայն որի՝ օրինագծի երկրորդ ընթերցմամբ քննարկումը կանցկացվի առաջին ընթերցմամբ ընդունվելուց հետո 24 ժամվա ընթացքում: Այնուհետեւ պատգամավորներն առաջին ընթերցումով քննարկել են «Պետական տուրքի մասին» ՀՀ օրենքում փոփոխություն կատարելու մասին» օրենքի նախագիծն առաջին ընթերցմամբ ընդունելու մասին հարցը, որը ներկայացրել է ՀՀ ֆինանսների նախարարի տեղակալ Կարեն Թամազյանը: Նշվել է, որ օրինագծով առաջարկվում է օրենքը համապատասխանեցնել այս տարվա հոկտեմբերին ընդունված ՀՀ հարկային օրենսգրքի դրույթներին: Նախատեսվում է ինտերնետ շահումով խաղերի ու վիճակախաղերի կազմակերպման տուրքը 100 մլն դրամի փոխարեն սահմանել 500 մլն դրամ: Հարցի վերաբերյալ իրենց տեսակետներն են հայտնել ԱԺ պատգամավորները: Վարդան Այվազյանը խոսել է ինտերնետային ծառայություն մատակարարող ընկերությունների գործունեության հարկային պարտավորությունների, ոլորտում առկա խնդիրների կարգավորման վերաբերյալ՝ նշելով, որ օրինագիծը սոցիալական ոլորտի խնդիրներին չի առնչվում: Նա հորդորել է գործընկերներին կողմ քվեարկել: Թեւան Պողոսյանը կարեւորել է շուկայի ուսումնասիրությունը եւ գումարների արդյունավետ օգտագործումը: ՀԱԿ խմբակցության տեսակետը ներկայացրել է Լեւոն Զուրաբյանը: Նա օրենքի նախագծին անդրադարձել է տնտեսության ընդհանուր զարգացման համատեքստում, խոսել հարկային վարչարարության խնդիրների, որոշ հարկատեսակների վերացման մասին, առաջարկներ ներկայացրել: Նա նշել է, որ ՀԱԿ-ը դեմ է քվեարկելու օրինագծին: Եզրափակիչ ելույթում ՀՀ ֆինանսների նախարարի տեղակալն անդրադարձել է պատգամավորների առաջարկներին: Նա ընդգծել է, որ նախաձեռնությունը տեխնիկական բնույթ ունի եւ արտահանման տեմպերի վրա ազդեցություն չի կարող ունենալ: ՀՀ ֆինանսների նախարարի տեղակալ Արմեն Հայրապետյանը քննարկման է ներկայացրել 2016 թվականի նոյեմբերի 30-ին ստորագրված ՀՀ կառավարության եւ Զարգացման ֆրանսիական գործակալության միջեւ թիվ CAM 1007 01 D վարկային համաձայնագիրը, որով կառավարությանը կտրամադրվի 40 մլն եվրո գումարի չափով բյուջետային աջակցության վարկ: Ծրագրի նպատակն է աջակցել ՀՀ կառավարության բարեփոխումների օրակարգին 2 հիմնական ուղղություններով՝ հարկաբյուջետային, սոցիալական եւ շրջակա միջավայրի կայունության խթանման ու մրցունակության ամրապնդման: Վարկի պայմաններն արտոնյալ են, մարման ժամկետը 20 տարի է: ԱԺ պատգամավորները հարցի վերաբերյալ ներկայացրել են իրենց տեսակետները: Նաիրա Զոհրաբյանն իր ելույթում խոսել է իրականացվող տնտեսական քաղաքականության, պետական աշխատողների կրճատման ու աղքատության տեմպերի աճի մասին: Նաիրա Զոհրաբյանը եւ Հեղինե Բիշարյանն անդրադարձել են ներդրումների կրճատմանը եւ այդ հարցում կարեւորել վստահության մակարդակի բարձրացումը: Հեղինե Բիշարյանը եւս արտաքին պետական պարտքի ավելացման ռիսկայնությանն է անդրադարձել: Նա նշել է, որ իրենք դեմ են վարկերին: Արամ Մանուկյանը ներկայացրել է արտաքին պարտքի ավելացման վիճակագրությունն ըստ տարիների՝ նշելով, որ բյուջեի մեկ երրորդը պետք է ուղղվի պետական պարտքի մարմանը: Պատգամավորը կարեւորել է տնտեսության աշխուժացմանը միտված քայլերի իրականացումը եւ անդրադարձել արտագաղթի տեմպերին: Վահե Էնֆիաջյանը մտահոգիչ է համարել վարկեր վերցնելու քաղաքականությունը եւ խոսել դրա հետեւանքների մասին: Միքայել Մելքումյանը կարծիք է հայտնել, որ նման քայլերով երկիրը կդառնա անվարկունակ: Պատգամավորը կարեւորել է վճարունակ պահանջարկի համատարած խթանման քաղաքականության իրականացումը: ՀՀ ֆինանսների նախարարի տեղակալ Արմեն Հայրապետյանը եզրափակիչ ելույթում ընդգծել է, որ փաստաթուղթը հնարավորություն է տալիս երկրին ապահովելու հարկաբյուջետային քաղաքականության հետագա ֆինանսական կայունությունը: Փոխնախարարը ներկայացրել է արտաքին պետական պարտքի ցուցանիշները եւ վարկերի մարման մեխանիզմները, անդրադարձել վարկերի թափանցիկությանը: Արմեն Հայրապետյանը ներկայացրել է նաեւ Հայաստանի Հանրապետության եւ Ասիական զարգացման բանկի միջեւ 2016 թվականի նոյեմբերի 11-ին ստորագրված «Ենթակառուցվածքների կայունության աջակցության ծրագիր. երկրորդ փուլ (ընթացիկ գործառնություններ)» վարկային համաձայնագիրը, որով Հայաստանին կտրամադրվի 90 մլն ԱՄՆ դոլարի չափով բյուջետային աջակցության վարկ: Նշվել է, որ 60 միլիոնը նախատեսված է 2016 թվականի, իսկ 30 մլն-ը՝ 2017 թվականի բյուջեի ծախսային ծրագրում: ԱԺ պատգամավորները ներկայացրել են իրենց դիրքորոշումը քննարկվող համաձայնագրի վերաբերյալ: Սուքիաս Ավետիսյանը նշել է, որ ներկայացված վարկային համաձայնագրերն ուղղված են ֆինանսական կայունության ապահովմանը: Միքայել Մելքումյանն անդրադարձել է հարկեր-ՀՆԱ հարաբերակցությանը, ընթացիկ բյուջետային ֆինանսավորման խնդիրներին, բիզնեսի զարգացման եւ ներդրումների համար ստեղծված պայմաններին: Նաիրա Զոհրաբյանը տնտեսական աճի ապահովման համար անհրաժեշտ մեխանիզմներին է անդրադարձել: Մհեր Շահգելդյանն անընդունելի է համարել արտաքին պարտքի շեշտակի աճը, քանի որ երկրում տնտեսությունը հետընթաց է ապրում, առկա է կապիտալի արտահոսք եւ բնակչության արտագաղթ: Նա մտավախություն ունի, որ պարտքի մարումը կմնա հետագա սերունդների վրա: Նիկոլ Փաշինյանը խոսել է պետական պարտքի սպասարկման համար նախատեսված միջոցներից ու նշել, որ այն վերջին երկու տարվա ընթացքում գերազանցել է սպասված գումարը: Եզրափակիչ ելույթում փոխնախարարն անդրադարձել է պատգամավորների հնչեցրած մտահոգություններին ու առաջարկներին: ՀՀ ֆինանսների փոխնախարարը քննարկման է ներկայացրել նաեւ Հայաստանի Հանրապետության եւ Վերակառուցման եւ զարգացման միջազգային բանկի միջեւ 2016 թ. դեկտեմբերի 9-ին ստորագրված «Զարգացման քաղաքականության չորրորդ վարկ» վարկային համաձայնագիրը: Նախատեսվում է Հայաստանին տրամադրել 50 մլն ԱՄՆ դոլարի չափով բյուջետային վարկ զարգացման քաղաքականության ֆինանսավորման ծրագրի չորրորդ փուլի իրականացման համար: Վարկն ուղղվելու է բյուջեի դեֆիցիտի ֆինանսավորմանը, վարկի պայմաններն արտոնյալ են: Վարկի մարումը կիրականացվի 25 տարում: Ազգային ժողովն արտահերթ նստաշրջանի աշխատանքը կշարունակի դեկտեմբերի 23-ին: