Վարչապետը մի շարք հանձնարարականներ տվեց

Այսօր վարչապետ Կարեն Կարապետյանը  բոլոր նախարարությունների և գերատեսչությունների ղեկավարներին հանձնարարեց՝ ամփոփել բոլոր հանձնարարականները, որոնք հնչել և նշվել են կառավարության նիստերին և մինչև տարեվերջ դրանք ամփոփել ու ավարտել: «Պատրաստել և ներկայացնել հաշվետվությունները, ինչպես նաև 2017 թվականի միջոցառումների և գերակա ծրագրերը, գալիք տարվա ծրագրերը` կոնկրետ պատասխանատուներով, գերատեսչության կամ նախարարության ղեկավարների կողմից: Գերակա խնդիրների և միջոցառումների ծրագիրն այսօր կառավարությունում է, խնդրում եմ` ամփոփեք, ռևիզիա արեք` ինչն է ճիշտ, ինչը ոչ, և ծրագրերը, որ մենք ֆիքսում ենք 2017 թվականի համար, դրանք կոնկրետ նախագծեր են, որոնք նախարարն է տանում, նախարարի տեղակալներն են տանում»,- ասաց վարչապետը: Տարածքային կառավարման և զարգացման նախարար Դավիթ Լոքյանին Կ.Կարապետյանը հանձնարարեց.«Ավարտել մարզերի անձնագրի ձևավորումը:Այնտեղ մենք ֆիքսում ենք բոլոր այն ցուցանիշները, որոնք բնութագրում են մարզը: Կոորդինացնել մարզպետների հետ աշխատանքը:Մարզպետներին, իրենց համապատասխան վարչություններին պետք է հանձնարարել յուրաքանչյուր համայնքի բյուջե պետք է վերլուծվի, համեմատվի համեմատելի բյուջեների հետ և հայտնաբերվի այն համամսնությունները, որի հիման վրա կձևավորվի համայնքի բյուջեն»: «Մեր զբոսաշրջության կոմիտեն և քաղավիացիայի վարչությունը առաջարկություններ են տվել վիզաների հայեցակարգի վերաբերյալ: Խնդրում եմ` այդ հարցը քննարկեք և լուծում տվեք: Համեմատեք նաև մեր հարևան երկրների վիզաների տրամադրման կարգի հետ»,-նամն հանձնարարական տվեց  ԱԳՆ-ին: