Սարի թաղի գործով դատական նիստը կարծես սերիալ լինի
«Սարի թաղի գործով կալանավորված 9 բնակիչներին առաջադրվել է նույնաբովանդակ և ոչ կոնկրետ մեղադրանքներ:Նրանց վերաբերյալ գործը գտնվում է դատարանում, այն մաս- մաս է ուղարկվել դատարան: Հարություն Թորոսյանի, Հրայր Իսախանյանի, Անդրանիկ Քյոսեյանի,Էդուարդ Զեյթունյանի վերաբերյալ գործն առաջինն է ուղարկվել դատարան, դրանից հետո ևս երկու հոգու՝ Սարգիս Արաբաջյանի, Կարեն Վանոյանի գործը և դրան հաջորդեց ևս երեք հոգու գործ»,- լրագրողների հետ հանդիպման ժամանակ ասաց Սարի թաղում կալանավորված բնակիչների պաշտպան Լիպարիտ Սիմոնյանը: Նրա խոսքով՝ քաղաքացիներին մեղադրանք է առաջադրվել մի խումբ անհայտ անձանց հետ իշխանության ներկայացուցչի նկատմամբ բռնություն կիրառելու համար: Փաստաբանի խոսքով՝ դատական վերջին նիստի ժամանակ, որը տեղի է ունեցել դեկտեմբերի 16-ին, հարցաքննվել է երկու տուժող ոստիկան, բայց նրանցից ոչ մեկը չի կարողացել հստակ ասել, թե ում կողմից է բռնության ենթարկվել, չեն էլ ճանաչել մեղադրալներին: «Միայն ոստիկաններից մեկն ասաց, որ հետագայում տեսանյութը դիտելով ամբաստալյաններից մեկին նմանեցրել է այդ տեսանյութում գործողություններ կատարող անձին»,-ասաց նա: Լիպարիտ Սիմոնյանն ասաց, որ պաշտպանական կողմը միջնորդություն է ներկայացրել մեղադրանքները կոնկրետացնելու վերաբերյալ, ինչին ի պատասխան դատախազն ասել է, որ դատավարության ընթացքում կպարզվի: Սարի թաղի բնակիչ Էդուարդ Զեյթունյանի կինը՝ Լալա Բեռնեցյանն էլ հավելեց, որ ամուսինը առողջական խնդիրներ ունի, բայց կալանավայրում համապատասխան բուժում չի ստանում. «Ես դիմում գրեցի Մարդու իրավունքների պաշտպանին, այնտեղից ինձ ասացին, որ ամուսինս համապատասխան բուժզննում անցել է, դեղորայքներ է ստանում, բայց դա այդպես չէ: Նա սրտի հետ կապված խնդիրներ ունի, բայց հիմա էլ ասում է, որ ոտքերն են դողում, չի կարողանում կանգնել, ամբողջ օրը քնած է»,-նշեց կինը՝ հավելելով, որ դատական նիստերից ոչ մի ակնկալիք չունի, քանի որ, ըստ նրա, ոչ մի փաստարկ չի ընդունվում որպես օրինական:
Հետևեք մեզ Viber-ում
