«Աստղիկ» ԲԿ-ի մոտ մշտապես խցանում ու վթարային իրավիճակ է

ԱԺ պատգամավոր  Սամվել Ալեքսանյանի  ընտանիքին  պատկանող  «Աստղիկ»  բժշկական կենտրոնի  բացումից  ի վեր  հարակից  փողոցում  մշտապես  խցանումներ են։  Չնայած բուժկենտրոնը  մեքենաների համար  կայանատեղի կառուցել է, սակայն դրա տարածքը  չի բավարարում  մեքենաներին։ «Առավոտ»-ի փոխանցմամբ՝ հիվանդանոցի այցելուների  մեքենաներն  ամեն օր  ու օրվա  բոլոր ժամերին  մշտապես շարված են  փողոցի երկայնքով՝ փակելով անգամ  հարակից բնակելի տների մուտքը։  Տաքսի մեքենաների  վարորդներն էլ հաճախորդ  «փախցնելու» համար  իրենց մեքենաներն են  հիվանդանոցին մոտ  կանգնեցնում ու առանց  այն էլ  նեղ փողոցն  ավելի նեղացնում,  մշտապես խցանում  առաջացնում։ «Գալիս են մեր դարպասների դիմացը կանգնում։  Էդ տաքսիստներն  էլ մյուս  կողմից  են արդեն  զզվեցրել, քիչ է մնում՝ տուն մտնեն»,- դժգոհում են բնակիչները։  Երթուղայինի վարորդներն  էլ ասում են. «Դրանց պատճառով  միշտ «պռոբկեք են»  էդ հատվածում։  Սրան մի լուծում պիտի տրվի, էդ տաքսիստներին  գոնե էդտեղից  հանեն։ Թե չէ՝  ամեն վայրկյան վթարային իրավիճակ է»։