Վլադիմիր Հակոբյան. Եթե Դալլաքյանն Արմեն Գևորգյանի զանգերին չի պատասխանել, ինչպե՞ս է ենթադրում դրանց բովանդակության մասին

Վիկտոր Դալլաքյանը երեկվա ասուլիսում մի շարք ուշագրավ հայտարարություններ արեց, որոնց շուրջ պարզաբանումներ ստանալու նպատակով 168 Ժամ»-ը զրուցել է ՀՀ նախագահի  խոսնակ Վլադիմիր Հակոբյանի հետ: Դալլաքյանն ասաց, թե, իբր, Սերժ Սարգսյանը «սարսափել է» իր նախորդ ասուլիսից և  փորձել է խոչընդոտել  այն: Ըստ նրա, նախագահի աշխատակազմի ղեկավար Արմեն Գևորգյանը երեք անգամ զանգահարել է իրեն, սակայն ինքը հեռախոսազանգերին չի պատասխանել, այնուհետ Գևորգյանը հաղորդագրություն է ուղարկել՝ խնդրելով կապ հաստատել իր հետ, սակայն Դալլաքյանն այդպես էլ չի արձագանքել: Անդրադառնալով թեմային՝ նախագահի խոսնակն ասել է. «Նախ՝ եթե պարոն Դալլաքյանը չի պատասխանել զանգերին, ապա ինչպե՞ս է ենթադրում այդ զանգերի բովանդակության մասին, թե ի՞նչ նպատակով են եղել պարոն Գևորգյանի զանգերը: Որքան ես կարողացա ճշտել պարոն Գևորգյանից, քանի որ այդ ասուլիսից առաջ պարոն Դալլաքյանը դեռ հանդիսանում էր աշխատակազմի ղեկավարի տեղակալ և նախագահի ներկայացուցիչ ԱԺ-ում, պարոն Գևորգյանը պարզապես փորձել է իր ենթակայից ճշտել հաջորդ օրն Ազգային ժողովում սպասվելիք աշխատանքների, ԱԺ-ում ընթացող գործընթացների վերաբերյալ, այսինքն՝ Դալլաքյանի բուն աշխատանքային  պարտականությունների հետ  կախված որոշ հարցեր: Այսինքն՝ պարոն Գևորգյանի զանգն իր ենթակային հետապնդել է բացառապես, այդ նպատակը, և, եթե պարոն Դալլաքյանը զանգերին չի պատասխանել, մի տեսակ «եթե-ապա» կոնֆիգուրացիաներով ենթադրություններ անել, թե զանգն ինչ նպատակով է եղել, այդքան էլ գեղեցիկ չէ»: