Իշխանությունը ապահովագրվում է վտանգներից

Իշխանությունը որեւէ կերպ չի ընկրկում իր համար վտանգավոր ու սկզբունքային հարցերում։ «Ազգային ժողովի կանոնակարգ» օրենքի նախագիծում պահպանվել են բոլոր դրույթները, որոնք իշխանությանն ապահովագրելու են տարբեր ֆորս-մաժորներից։ Թեպետ հիմնական զեկուցող Հովհաննես Սահակյանն ասաց, որ առաջինից երկրորդ ընթերցում եղել են տարբեր առաջարկներ, որոնք քննարկվել են, արդյունքում նախագիծը լրամշակվել է, փոփոխվել, սակայն արդյունքում պարզվեց, որ չեն վերանայավել խնդրահարույց դրույթները։ Հատկապես, ամենախնդրահարույցը ըստ որի՝ գործուղման մեջ գտնվող պատգամավորն իրավունք կունենա մասնակցել քվեարկություններին։ Սա նշանակում է, որ ՀՀԿ-ն հաջորդ խորհրդարանում ապահովագրված է լինելու տարատեսակ ռիսկերից ու իր համար կարեւոր նախագծերի տապալումից։ Փոփոխված տարբերակում պատգամավորների ելույթները չեն սահմանափակվելու մինչև 5 րոպեով, բոլորի համար սահմանվել է մինչև 10 րոպե: Խմբակցություններին տրվել են երկու լրացուցիչ լիազորություն՝ խորհրդարանական լսումների կազմակերպում, արտահերթ նախագծեր շրջանառության մեջ դնելու ու արտահերթ քննարկելու իրավունք: Սակայն երկրորդ ընթերցմամբ չի փոխվել քննադատությունների արժանացած դրույթն, ըստ որի՝ գործուղման մեջ գտնվող պատգամավորն իրավունք կունենա մասնակցել քվեարկություններին: «Եթե պատգամավորը մշտական հանձնաժողովներում մասնակցել է քննարկումներին, ապա իրավունք պետք է ունենա նաև իր դիրքորոշումը հայտնելու: Սա ոչ թե քվորում ապահովելու խնդիրն է լուծում, այլ պատգամավորն իր վերաբերմունքն է հայտնում օրինագծի վերաբերյալ: Պատգամավորը փակ ծրարով հանձնում է քարտուղարություն իր կողմ, դեմ կամ ձեռնպահ լինելը, և հարցի քննարկման ժամանակ բացվում է ծրարը և նրա ձայնը գումարվում ընդհանուր թվին»,- ներկայացրեց Սահակյանը: Պատգամավոր Գագիկ Ջհանգիրյանն իր ելույթում ասաց, որ առաջինից երկրորդ ընթերցում հսկայածավալ աշխատանք է կատարվել, նախագիծը զգալիորեն բարելավել է, բայց կան թերություններ. «Եթե որևէ մեկն ինձ հարցնի, թե այս օրենսգրքի հիմնական բացը, թերացումը որ ինստիտուտին է վերաբերում, միանշանակ կասեմ, որ դա վերաբերում է խորհրդարանական վերահսկողության ամբողջ ինստիտուտին: Նախագծի հեղինակները հսկայածավալ աշխատանք կատարելով հանդերձ, իմ կարծիքով, դեռևս լիարժեքորեն չեն վերծանել, բացել կանոնակարգ օրենքում Սահմանադրության մեջ նախատեսված Ազգային ժողովի վերահսկողական լծակները»,- ասաց նա: ԲՀԿ խմբակցության ղեկավար Նաիրա Զոհրաբյանը եւս կողմ է ԱԺ կանոնակարգում փոփոխություններ անելու օրինագծին: Նա հույս ունի, որ հաջորդ խորհրդարանում կաշխատեն պրոֆեսիոնալները, իսկ «ժամավաճառների» համար ուղղակի տառապանք է լինելու 17-ի նիստերը.« Այսինքն՝ նրանք, ովքեր տարբեր ատրիբուտներից բացի այս ատրիբուտն էլ ունեն, այս անգամ երկար են մտածելու՝ այդ ատրիբուտն իրենց պե՞տք է, թե՝ չէ, թե լրացուցիչ գլխացավանք է դառնալու իրենց համար: Կարևոր է՝ այս օրենքը հնարավորինս տա առավելագույն արդյունք»,- ասաց Զոհրաբյանը: Վերջինս օրինագծի մեջ իր համար կարևոր խնդիր է առանձնացրել, այն է, երբ պատգամավորը, չկիսելով խմբակցության տեսակետը, պետք է վայր դնի մանդատը: «Իհարկե, այս խնդիրը կանոնակարգով չի լուծվելու, բայց միանշանակ համաձայն եմ, որ ժողովուրդն ընտրում է այդ ցուցակում լավագույն դեպքում լիդերին, ով ցուցակը ղեկավարող անձն է լինելու: ԲՀԿ-ի օրինակը բերեմ՝ բոլորիս համար պարզ է, որ 2007, 2012-ին հանրությունը ձայնը տվել է Գագիկ Ծառուկյանին և ԲՀԿ ծրագրին: Եթե մեկը կարող է ասել, որ տվել են հատուկ իրենց համար, որ իրենք եղել են ցուցակում, ես նման գնահատականն ազնիվ չեմ համարի»,- ասաց նա և նշեց, թե համաձայն է՝ պատգամավորն ազատ է քվեարկել ոնց ուզում է, բայց կա խմբակցություն, որտեղ կարող են տեսակետը ներկայացնել, կռվել, քննարկել: Անի Սահակյան