КГБ-ի ուժն ու Արևմուտքի սթափությունը

Սենսացիոն արդյունքներ` Ֆրանսիայում Այն, որ Եվրոպան խորը ճգնաժամի մեջ է հայտնվել արդեն տևական ժամանակ` արդեն գաղտնիք չէ որևէ մեկի համար: Առհասարակ, վերջին շրջանում Արևմուտքում տեղի են ունենում ուշագրավ գործընթացներ, որոնք վկայում են Ռուսաստանի հանդեպ կոշտ քաղաքականության նկատմամբ փոփոխության միտումները: Թվում է, որ Եվրոպան ձգտում է վերանայել իր կոշտ դիրքորոշումը Մոսկվայի հանդել, կարծես, սթափվելու և ամեն ինչ ծանր ու թեթև անելու ժամանակներ են ԵՄ-ի համար... Դա են փաստում վերջին օրերին եվրոպական երկրներում տեղի ունեցող ուշագրավ իրադարձությունները: Ֆրանսիայում աջերի և կենտրոնամետների փրայմերիզի առաջին փուլը սենսացիայով արդյունքներով է ավարտվել. զգալի տարբերությամբ հաղթանակ է տարել նախկին վարչապետ Ֆրանսուա Ֆիյոնը, որը ռուսամետ թեկնածու է համարվում: Երկրորդ փուլում նա հանդիպելու է նախկին վարչապետ Ալեն Ժյուպեի հետ, իսկ նախկին նախագահ Նիկոլա Սարկոզին պարտվել է և դուրս եկել նախագահական մրցապայքարից: Հաշվի առնելով իշխող Սոցիալիստակական կուսակցության և նախագահ Ֆրանսուա Օլանդի ցածր վարկանիշը, խոշորագույն ընդդիմադիր ուժի՝ աջերի և կենտրոնամետների թեկնածուն, ամենայն հավանականությամբ, 2017-ին Ելիսեյան պալատի նոր ղեկավարը կդառնա: Օգոստոսին աջ-կենտրոնամետներից նախագահի պաշտոնին առաջադրվելու իրավունքի պայքարի մեջ էին մտել 7 թեկնածուներ՝ նախկին նախագահ Նիկոլա Սարկոզին, նախկին վարչապետեր Ալեն Ժյուպեն և Ֆրանսուա Ֆիյոնը, պատգամավոր Բրյունո Լը Մերը, Նատալի Կոստյուշկո-Մորիզեն, Ժան-Ֆրեդերիկ Պուասոնը և Ժան-Ֆրասնուա Կոպեն: Նախընտրական արշավի սկզբում դիտորդների մեծ մասն առավելություն էին տալիս Ժյուպեին և Սարկոզիին, իսկ Ֆիյոնը Լը Մերի հետ հավասարապես բաժանում էր երրորդ-չորրորդ տեղերը: Նիկոլա Սարկոզին, որը պարտվեց և դուրս եկավ նախագահական ընտրապայքարից, հայտարարել է, որ 2–րդ փուլում քվեարկելու է Ֆիյոնի օգտին և իր համակիրներին կոչ է արել երբեք ծայրահեղությունների զոհ չդառնալ։ «Ես չկարողացա համոզել ընտրողների մեծ մասին։ Ես հարգում եմ և հասկանում ապագայի համար այլ քաղաքական գործիչների ընտրելու նրանց կամքը։ Ցանկանում եմ շնորհավորել Ֆրանսուա Ֆիյոնին և Ալեն Ժյուպեին, ովքեր անցել են երկրորդ փուլ»,-ասել է նա։ Ռուսաստանն ուշադիր հետևում է Ֆրանսիայում նախընտրական արշավին, օրերս հայտարարել է ՌԴ նախագահի մամուլի խոսնակ Դմիտրի Պեսկովը: Բայց ինչպես երևում է, Ռուսաստանը ոչ միայն հետևում է, այլև` գործում է... Մոլդովայում ու Բուլղարիայում հաղթեցին ռուսամետները Մոլդովայում և Բուլղարիայում վերջերս տեղի ունեցած նախագահական ընտրություններում հաղթեցին Ռուսաստանի հետ հարաբերությունների բարելավման կողմնակից թեկնածուները` Մոլդովայում` սոցիալիստական կուսակցության նախագահ Իգոր Դոդոնը, Բուլղարիայում` Ռումեն Ռադևը: Երկուսն էլ հաղթեցին իրենց` ընդգծված արևմտամետ հիմնական մրցակիցներին: «Ես խիստ կբարելավեմ Մոլդովայի և Ռուսաստանի հարաբերությունները։ Այդ հարաբերությունները շատ կարևոր են երկրի բնակիչների համար»,-ասել էր Դոդոնը մինչ ընտրությունները։ Ռումեն Ռադևն իր հերթին կողմ է հանդես գալիս Ռուսաստանի դեմ սահմանված պատժամիջոցների չեղարկմանը։ Ռադևը դեմ է Բուլղարիայի անդամակցությանը Հյուսիսատլանտյան դաշինքին ու Եվրամիությանը: Նա պահանջում է անհապաղ չեղարկել Ռուսաստանի նկատմամբ սահմանված պատժամիջոցները և սերտացնել հարաբերությունները Մոսկվայի հետ: 2016թ. օգոստոսին ի նշան երկրի ղեկավարության վարած քաղաքականության դեմ բողոքի՝ հրաժարականի դիմում է ներկայացրել Բուլղարիայի ռազմաօդային ուժերի հրամանատարի պաշտոնից: Հիշեցնենք, որ Բուլղարիան 2004-ից անդամակցում է Եվրամիությանն ու Հյուսիսատլանտյան դաշինքին: Այսպիսով, Ռուսաստանը նոր դաշնակիցներ ձեռքբերեց Մոլդովայում և Բուլղարիայում: Այս երկրներում նախագահական ընտրությունների արդյունքները վկայում են, որ Ռուսաստանը նոր դաշնակիցներ կունենա Արևելյան Եվրոպաում։ Ակնհայտ է, որ ԵՄ-ում, կամաց-կամաց ընտրությունների արդյունքները վկայում են ԵՄ-ի «ցեմենտում» ավելացող ճաքերի մասին։ Եվրոպայում հաղթում ու իշխանության են գալիս սոցիալիստ-ռուսամետները: Վաշինգտոնի, Լոնդոնի և Եվրամիության արտաքին քաղաքականությունը, որի հիմքում հակառուսականությունն է, ըստ էության, տանուլ է տալիս: Մերկելը կառաջադրվի չորրորդ անգամ, բայց դիրքերը` թույլ են Գերմանիայի կառավարության ղեկավար Անգելա Մերկելը կառաջադրի իր թեկնածությունը Քրիստոնեա-դեմոկրատական և Քրիստոնեա-սոցիալիստական միությունների բլոկից կանցլերի թեկնածուի պաշտոնում։ Նա հայտարարել է այդ մասին՝ Բեռլինում ելույթ ունենալով մամուլի առջև. «Այդ ընտրությունները կլինեն ծանր, ինչպես երբևէ, համենայն դեպս Գերմանիայի վերամիավորման պահից։ Ինձ համար Քրիստոնեա-դեմոկրատական միությունն առաջնորդելը միշտ նշանակել է պատրաստ լինել կանցլերի աշխատանքին: Ես այդ մասին շատ երկար եմ մտածել, ես որոշել եմ առաջադրվել չորրորդ անգամ: 11 տարի աշխատելուց հետո նորից առաջադրվելու որոշումը բնավ սովորական բան չէ», - ասել է Մերկելը: Նրա փոխանցմամբ, որոշումն ընդունվել է երկիրը միավորելու, ազատության, ժողովրդավարության, օրենքի գերակայության, հանուն մարդու արժանապատվության պայքարելու համար՝ առանց հաշվի առնելու նրա մաշկի գույնը, կրոնը կամ քաղաքական դիրքորոշումը. «Դա է ինձ առաջնորդում, դրա համար եմ պայքարել և էլի կպայքարեմ, բայց հաղթել կարող ենք միայն միասին»: Մերկելն, այսպիսով, մտադիր է դառնալ Գերմանիայի կանցլեր 4-րդ անգամն անընդմեջ։ Նա զբաղեցնում է այդ պաշտոնը 2005-ից։ Բունդեսթագի ընտրությունները կանցկացվեն 2017թ. աշնանը։ Սակայն Մերկելի դիրքերը էականորեն թուլացել են, ինչի հիմնական պատճառներից է հարյուր հազարավոր փախստականների ընդունելու ծանր բեռը: Թրամփի ընտրությունից հետո միջազգային քաղաքական շրջանակներում ոմանք նույնիսկ պնդում են, թե այլևս Մերկելն Արևմուտքում միակն է, ով պաշտպանում է դեմոկրատական արժեքները և համոզված է, որ Ռուսաստանի հանդեպ կոշտ դիրքորոշումը չի կարելի վերանայել: Արդեն տևական ժամանակ է, ինչ փորձագետներ կարծիք են հայտնում, որ արևմտյան ամբողջ աշխարհը քաղաքական խոշոր փոփոխությունների շեմին է: Միգրանտների ցավոտ թեման, Ռուսաստանի հետ հարաբերությունները, տնտեսությունը և բազում այլ հարցեր Արևմուտքում խթանել են ազգայնական տրամադրությունները: Մեծ Բրիտանիան հունիսի 23-ին հանրաքվեով որոշել է դուրս գալ Եվրոպական միության կազմից, Միացյալ Նահանգների նախագահական ընտրություններում հաղթել է Դոնալդ Թրամփը, եվրոպական մի շարք երկրներում ակտիվացել են ներքին խնդիրների վրա կենտրոնանալու և մնացյալ աշխարհից մեկուսանալու կոչերով հանդես եկող քաղաքական գործիչները: Հաջորդ տարի նախատեսված են ընտրություններ Ֆրանսիայում, Գերմանիայում, Նիդերլանդներում, Հունգարիայում, Սերբիայում, Սլովենիայում: Սպասե՞լ նաև Սիրիայում Պուտինի հաղթանակին Մինչ Սիրիայում շարունակվում է իսկական հումանիտար աղետը, աշխարհը ԴԱՒՇ-ին մոռացած` զբաղված է Ասադով: Սակայն այլ են` Պուտինի քայլերը: Նախօրեին Ռուսաստանի փոխվարչապետ Դմիտրի Ռոգոզինի Դամասկոս է այցելել: Ռուսաստանը և Սիրիան գյուղատնտեսական ապրանքների համար մաքսային «կանաչ միջանցք» են ստեղծում: Համապատասխան պայմանագիրը ստորագրվել է կատարած այցի ընթացքում: ՌԴ փոխվարչապետը գլխավորել է առևտրատնտեսական և գիտատեխնիկական երկկողմ մշտական հանձնաժողովի ռուսական հատվածը: Ընդ որում` Ռոգոզինը Դամասկոս է ժամանել պատվիրակության կազմում, որի մեջ ներառվել են արդյունաբերական խոշոր ընկերությունների ղեկավարներ: «Այսօր չէինք ցանկանա ազգանուններ և ընկերությունների անվանումներ հրապարակել: Հենց ռուսական այդ ընկերությունների անունները բարձրաձայնենք, որոնք վտանգվում են Սիրիա մտնելով անգամ ռազմական գործողությունների ժամանակահատվածում, այստեղ տնտեսական նոր իրականություն են ստեղծում, ինչ-որ բան են կառուցում, ինչ-որ բան են վերականգնում, այստեղ փող են աշխատում, թեկուզ քիչ, բայց շատ կարևոր նաև Սիրիայի բնակչության համար, անմիջապես կհայտնվեն հերթական ինչ-որ պատժամիջոցային ցուցակների մեջ»,- հայտարարել է Ռոգոզինը՝ հավելելով, որ «չի ցանկանում անուններ հրապարակելով մարդկանց վտանգի ենթարկել»: Փաստորեն, հողին հավասարեցված Սիրիային աջակցելու հարցում Պուտինը նոր հայտ է ներկայացնում, կարծես, աշխարհին միայնակ «ձեռնոց նետելով»: Թամար Բագրատունի