«Թանկարժեք տղան» կմեծանա ու կորոշի

Կամաց-կամաց նվազում են բոլոր հարցականները ալիևյան կլանի հավերժացման ճանապարհին... Ադրբեջանի նախագահ Իլհամ Ալիևը Բաքվում անցկացված լրատվական գործակալությունների հինգերորդ համաշխարհային կոնգրեսում պատասխանել է իր երեխաների կողմից քաղաքականությամբ զբաղվելու հնարավորության մասին հարցին. «Դա կախված է նրանց ցանկություններից ու պլաններից։ Կարծում եմ, որ նրանք դեռ գոհ են իրենց գործունեությունից։ Նրանք շատ ակտիվ են մշակութային ու սոցիալական հարցերում։ Ի դեպ, նրանցից երկուսը՝ իմ դուստրերը, կապված են մեդիայի հետ։ Ինչ վերաբերում է իմ որդուն, ապա նա ուսանող է։ Նրա հետագա ընտրությունը կախված կլինի հենց իրենից։ Նա տնտեսագիտական կրթություն է ստանում Բաքվում։ Այդպիսով, դա կլինի իրենց որոշումը։ Ադրբեջանը բոլորի համար հավասար հնարավորություններ ստեղծող երկիր է։ Եթե նրանք ցանկանան իրենց ապագան կապել քաղաքականության հետ, ապա դա կլինի նրանց ընտրությունը»։ Փաստորեն, Ալիևը որոշակիորեն անտեղյակություն խաղալով փորձել է «հանելուկային» մթնոլորտ ստեղծել իր ժառանգների` քաղաքականություն մտնելու հնարավորությունների վերաբերյալ, կարծես, հարցին հստակ պատասխան տալուց խուսափելով: Սակայն, նաև ակնհայտ է, որ նա չի բացառել, իսկ դա նշանակում է`իհարկե, ամեն ինչ հնարավոր է: Իրականում, որևէ զարմանալի բան չկա: Ալիև կրտսերի որոշումը, պարզ է, որ կլինի գերդաստանի իշխանության պահպանման օգտին, և կարևորն այն է, որ այսօր Իլհամ Ալիևը դա չի բացառում և թողնում է, իբր, զավակների «ընտրությանը»: Հիշեցնենք, որ Ադրբեջանում կայացած սահմանադրական փոփոխությունների իրականացումից հետո նախագահն արդեն 5 տարվա փոխարեն կղեկավարի 7 տարի: Բացի այդ, ամենակարևոր դրույթը, հանվեց նաև տարիքային սահմանափակումը, սահմանադրության համաձայն Ադրբեջանի նախագահ կարող էին դառնալ 35 տարեկան և բարձր քաղաքացիները: Մինչդեռ հիմա տարիքային սահմանափակումը հանվել է նաև պատգամավորների համար, և փաստորեն, հիմա բոլոր չափահաս քաղաքացիները կարող են ընտրվել և նախագահ, և պատգամավոր: Իսկ թե որքանով է Ադրբեջանը` «բոլորի համար հավասար հնարավորություններ ստեղծող երկիր», ապա դրանում համոզվելու համար իրադարձությունների պակաս չի զգացվում: Միջազգային իրավապաշտպան կառույցները, դիվանագետները շաբաթ չի լինում, որ չքննադատեն Ադրբեջանում տիրող անմխիթար վիճակը` մարդու իրավունքների, ժողովրդավարության մակարդակի առիթով, ձերբակալությունների, հետապնդումների համար: Վերջին թարմ նորությունն այս թեմայով ԵԽԽՎ գլխավոր քարտուղար Թորբյորն Յագլանդի հայտարարությունն էր՝ կապված Իլգար Մամեդովի գործով Ադրբեջանի Գերագույն դատարանի ընդունած որոշման հետ։ Ադրբեջանի Գերագույն դատարանը չի աջակցել ՄԻԵԴ-ի որոշումը կատարելու մասին Ադրբեջանի ստանձնած պարտավորության իրագործմանը։ Յագլանդը հայտարարել է, որ դա Ադրբեջանի կողմից Մարդու իրավունքների եվրոպական կոնվենցիայի հանդեպ աղաղակող անհարգալից մոտեցում է և քայքայում է իրենց համագործակցության ողջ ոլորտը. «Այդ գործը շոշափում է ԵԽ-ի բոլոր 47 անդամ երկրներին, որոնք հավաքական պատասխանատվություն են կրում կոնվենցիայի իրագործման համար։ Դրա համար էլ հարցը շուտափույթ կընդգրկվի ԵԽ Նախարարների կոմիտեի հաջորդ նիստում»։ Հիշեցնենք, որ Իլգար Մամեդովը կալանավորվել է 2013թ. հունվարին` Իսմայիլիի շրջանի անկարգությունները կազմակերպելու մեղադրանքով և դատապարտվել է 7 տարվա ազատազրկման։ 2014 թվականին ՄԻԵԴ-ը անհիմն է ճանաչել Իլգար Մամեդովին կալանքն ու ազատազրկման դատապարտելը`Ադրբեջանին կոչ անելով ազատ արձակել նրան։ Իրավապաշտպան Լեյլա Յունուսն ու ամուսինը` Արիֆ Յունուսը, Ռաուֆ Միրքադիրովը և այլ` իշխանության կարծիքից տարբերվող տեսակետներ ունեցող տասնյակ ադրբեջանցիները, թերևս, ամենից լավ են պատկերացնում, թե ինչ է նշանակում` «բոլորի համար հավասար հնարավորություններ ստեղծող երկիր»... Ալիևյան կլանի գոյության ճանապարհին այս մարդիկ են ամենաթանկ գինը վճարել. կորցնելով ազատություն, առողջություն` նրանք սեփական երկրից ուղղակի փախել են: Մետաքսյա Շալունց