ՊՌ-ն ու «շանտղությունը»

Կարեն Կարեպետյանի վարչապետի պաշտոնում  նշանակվելուց հետո գնալով ավելի և ավելի ակնհայտ է դառնում, որ կառավարությունն անցել է «դրայվի» ռեժիմի: Ընդ որում՝ դա նկատելի է անգամ պաշտոնական հաղորդագրությունների քանակից և դրանցում օգտագործված ոճային նորամուծություններից: Օրինակ,  ուրբաթ օրը կառավարության պաշտոնական կայքում զետեղված հաղորդագրության մեջ՝ տեքստային տարբերակում օգտագործվել է «շանտղություն », արտահայտությունը, որը ֆերմերների հետ խորհրդակցության ժամանակ  օգտագործել է վարչապետը: Անդրադառնալով սննդամթերքի անվտանգության և որակի ապահովման խնդրին՝ վարչապետ Կարեն Կարապետյանը նշել է, որ Սննդամթերքի անվտանգության պետական ծառայության նորանշանակ պետից պահանջվում է խիստ վերահսկողություն իրականացնել ոլորտում: «Ուղղակի դա «շանտղություն է», որ մենք թույլ ենք տալիս կամ չենք հետևում՝ մեր երեխան, մեր հարսը, մեր աղջիկն ինչ են ուտում», - ասել է վարչապետը: Խոստովանանենք, որ սա նոր լեքսիկոն է կառավարության պաշտոնական գրագրության մեջ: Հասկանալի է, որ աշխատանքային խորհրդակցությունների ժամանակ վարչապետը, նախագահը, նախարարները և ընդհանրապես  ցանկացած ղեկավար պաշտոնյա կարող է զայրանալ, ձեռքը խփել սեղանին, անել որոշակի հայտարարություններ՝  դրանք համեմլով ոչ ստանդարտ արտահայտություններով : Բայց, որպես կանոն, այս կարգի արտահայտությունները չեն հրապարկվում. համենայն դեպս,  պաշտոնական հաղորդագրությունների մեջ շատ հազվադեպ  են հանդիպում  բառեր, որենք բնորոշ են  ժարգոնային և առօրյա խոսակցական բառապաշարին: Իսկ,  եթե անգամ հանդիպում են,  ապա դրանք դիտարկվում են ՊՌ տեխնոլգիաների շրջանակում: Վարչապետին այս կարգի ՊՌ այս պահին թերևս ապահավում է բարեփոխիչի իմիջ, բայց  խորքային իմաստով գյուղատնտեսությունն ու ֆերմերները դրանից շոշափելի արդյունք հազիվ թե ստանան: Կոնկրետ ֆերմերներին հուզող խնդիրների առնչությամբ վարչապետի կողմից հստակություն  չի մտցվել, այլ ընդամենը հնչեցվել են հարցեր: «Պետության, կառավարության հիմնական գործառույթը ոլորտի բիզնեսմեններին օգնական լինելն է և չխանգարելը: Քաղաքականությունը, որ վարում ենք գյուղատնտեսության ոլորտում՝ ճի՞շտ է, թե՞ ոչ, սուբսիդավորումը, որ անում ենք, ճի՞շտ է, թե՞ ոչ, համատարած, որ բոլորի կողքին կանգնում ենք, ճի՞շտ է, թե՞ ոչ: Ո՞նց պետք է կանգնենք. պետք է կանգնենք պոտենցիալ հաջողակի, բեռ վերցնողի կողքին, որպեսզի մենք ձեզ հետ համատեղ ձևավորենք մեր ստրատեգիան այս ոլորտում, - ասել է կառավարության ղեկավարը և շարունակել,- ինչո՞վ օգնենք մեր արտադրողին, որ ինքը մրցունակ լինի»: Այդ հարցերը, որ բարձրացրել է վարչապետը, ֆերմերներին, թերևս,  քաջ հայտնի է: Պարզապես նրանց պետք էր այդ հարցերի պատասխանները ստանալ: Բայց այդ պատասխանները նրանք չեն ստացել: Միակ կոնկրետությունը, որն արվել է  Կարեն Կարապետյանի կողմից՝  հիմնադրամի ստեղծման մասին  տեղեկացումն է եղել. «Մենք անպայման ստեղծելու ենք հիմնադրամ, որի հիմնական նպատակն է լինելու բիզնեսին աջակցելը, բայց՝ որպեսզի բիզնեսը փող աշխատի: Մենք սուբսիդավորելու ենք այն կառույցին ու այն տնտեսությանը, որը շանս ունի մի օր ոտքի կանգնելու, և սուբսիդավորում չուզի»:  Վարչապետը, ամփոփելով խորհրդակցությունը, նշել է, որ ակնկալում է խորհրդակցության մասնակիցներից առաջարկությունների փաթեթ. «Ձեր բիզնեսը ձեր փոխարեն ոչ ոք չի զարգացնելու, մեր երկիրը, մեր գյուղը ոչ ոք մեր փոխարեն չի կառուցելու, ոչ ոք մեզ ձրի փող չի տալու: Փող ենք տալիս, փող ենք աշխատելու այն դեպքում, եթե տրամաբանություն կա: Դուք ինձանից չինովնիկ եք: Որպեսզի մեր հանդիպումն առարկայական լինի, աշխատանքային խումբ ստեղծեք, որը գյուղատնտեսության նախարարի հետ համատեղ կազմի գյուղատնտեսության ոլորտի ստրատեգիան՝ ոնց ենք կրթում, ոնց ենք սուբսիդավորում, ոնց ենք արտոնություն տալիս, ոնց ենք խոշորացնում, արտահանում», - ասել է  Կարեն Կարապետյանը: Առաջարկների և փոփոխությունների գնահատման ժամանակը ևս անշուշտ կգա, իսկ առայժմ պետք  է արձանգրել, որ ՊՌ-ն ավելի շատ է, քան բուն գործը:   Դավիթ Մանուկյան