Փողը կա, տեղը՝ նույնպես

Այսօր ԱԺ պաշտպանության, ազգային անվտանգության եւ ներքին գործերի հանձնաժողովում արտահերթ նիստ էր հրավիրվել՝ յուրաքանչյուր աշխատողի աշխատավարձից 1000 դրամ պահելու աղմուկ հանած որոշման հետ կապված: ՊՆ նախարար Վիգեն Սարգսյանն անձամբ զեկուցեց նախագիծը՝ համապատասխան օրենքներում նախատեսված փոփոխությունների վերաբերյալ։ Ըստ այդմ՝ 2017թ հունվարի 28-ից հետո առաջացած մահվան դեպքում յուրաքանչյուր զինծառայողի ընտանիքին պետք է հատկացվի միանվագ 10 մլն դրամ։ Այնուհետեւ, եթե զոհվածը սպա է, նրա ընտանիքին ամսական 300 հազար դրամ նպաստ, ենթասպայի դեպքում՝ 250, իսկ շարքային զինծառայողի դեպքում՝ 200 հազարական դրամ։ Եթե զինծառայողը վիրավոր է եւ երկրորդ կարգի հաշմանդամ է, ապա նրան կտրվի 5 մլն դրամ միանվագ օգնություն եւ համապատասխանաբարար՝ 250, 150 եւ 100 հազարական դրամ։ Նախատեսվում են նաեւ այլ փոխհատուցումներ ուսանող երեխա ունենալու եւ այլ դեպքերի համար։ Նախարարն անդրադարձավ նաեւ սոցիալական ցանցերի այն քննարկումներին, թե՞ արդյոք արդար է, որ սահմանվել է մեկ միասնական վճար եւ տարբեր եկամուտներ ունեցողների համար տարբերակում չկա։ Նրա խոսքերով` իրենք ընտրել են նվազագույն վճար սահմանելու սկզբունքը, ինչը ներդրված է հարկային համակարգում` անկախ այն հանգամանքից, թե որքան տարբեր է տնտեսվարողների շրջանառությունը։ Իսկ նրանք, ովքեր ավելի շատ վճարելու ցանկություն կունենան, կարող են դա անել. «Թե ինչ է լինելու այդ գումարների հետ, եթե այդ գումարները , Աստված տա, պետք չլինեն: Օրենսդրությունը սահմանում է, որ խորհուրդը կարող է որոշում կայացնել եւ այդ գումարն օգտագործել նախորդ տարիներն հաշմանդամություն ստացած զինծառայողների ընտանիքներին կամ նրանց»: «Զոհված և հաշմանդամություն ստացած զինծառայողների ընտանիքներին սոցիալական աջակցություն տրամադրելու գաղափարն ինքնին շատ կարևոր է: Բայց արդյոք արդարացի՞ է, որ բոլորն անկախ իրենց աշխատավարձի չափից պիտի փոխանցեն նույն գումարը»,-հարցրեց պատգամավոր Խաչատուր Քոքոբելյանը: «Ոչ ոք չի կասկածում, որ ժամ առաջ, օր առաջ այս բոլոր խնդիրները պետք է լուծվեն: Բայց սա շատ էմոցիոնալ խնդիր է, զգացմունքային, որովհետև խոսքը բանակի մասին է: Ակնհայտ է, որ սա հարկատեսակ է: Սահմանադրությամբ էլ, գործող օրենքով էլ այլ ճանապարհ չունենք: Պետք է հստակ ասվի, չվախենալ, որ սա հարկ է բանակին: Արդարացի՞ եք համարում, որ մանկավարժից էլ, պատգամավորից էլ նույն մասնաբաժինն է հանվելու»,- ասաց Խ. Քոքոբելյանը: Վիգեն Սարգսյանը պատասխանեց, որ նվազագույն աշխատավարձ ստացող մարդկանց օրենքը չի վերաբերում, իսկ մնացած բոլորը, այո, իրենց աշխատավարձից պարտադիր կարգով պիտի 1000 դրամ փոխանցեն: «Սա ուսանողի համար մի շաբաթվա տրանսպորտի փող է»,- նկատեց Խաչատուր Քոքոբելյանը: Նախարարն ասաց, որ իրենք փորձելու են անդրադառնալ նաև քառօրյա պատերազմի ժամանակ վիրավորված կամ զոհված անձանց՝ գուցե նպաստների մեծացման տեսքով: «Քառօրյա պատերազմը և դրանից հետո ստեղծված վիճակը հուշեցին, որ երբ չկա միասնական համակարգ, մենք ունենում ենք էմոցիոնալ ու չկանոնակարգված վիճակ, որ Երևանին մոտ ապրող զինվորի ընտանիքը ավելի շատ աջակցություն է ստանում, քան՝ հեռավոր մարզում բնակվողը: Մենք պետք է սա էլ հաշվի առնենք»,- նշեց Վիգեն Սարգսյանը։ Քոքոբելյանն ասաց, որ խնդիրը պետք է լուծվի, փողը կա, տեղն էլ կա: Նա ստվերի տեղը ցույց տվեց՝ ասելով, որ 35 տոկոս ստվեր կա, դա բոլորը գիտեն: «Մեծ հույս ունեմ, որ բարոյական ու քրիստոնեական ընկալումը կգործի: Ընդունելով բոլոր քննադատությունները, հասկանալով՝ պիտի նաև արդար լինենք: Երկար տարիներ բազմաթիվ գործարարներ, պետական պաշտոնյաներ, մեծ մասնակցություն են ունեցել: Եվ որևէ մեկը սա ցույց չի տալիս»,- նշեց Վիգեն Սարգսյանը: Նրա խոսքով. «Երբ մենք անընդհատ խոսում ենք այն մասին, թե ինչու այս գործարարը չի լուծում այդ խնդիրը, մենք իրականում ամբողջ ճշմարտությունը չենք ասում: Ես ձեզ կոչ եմ անում նայել «Հայաստան» համահայկական հիմնադրամի վերջին տարիների կուտակված միջոցների բացվածքները: Դրանք շատ բան կասեն ձեզ: Ես չեմ ասում, որ սա արդարացնում է որեւէ մեկի՝ հարկ վճարելու կամ չվճարելու, նամանավանդ՝ ապօրինի հարստանալու ցանկությունը, բայց դրա համար կա Քրեական օրենսգիրք»: Վիգեն Սարգսյանն ասաց, որ եթե մենք շարունակենք խոսել, որ ովքեր կոռումպացված են, ավելի շատ ներդրում պետք է ունենան այդ ամեն ինչին, մենք ոչ թե պայքարելու ենք կոռուպցիայի դեմ, այլ՝ կոռուպցիան սոցիալական արդարություն ենք կոչելու. «Ինձ համար դա ընդունելի չի: Հասարակությունը պետք է նվազեցնի իր կախվածությունն այն մարդկանց փողերից, ում փողերի հանդեպ չունի վստահություն»: Նախագիծը դրվեց քվեարկության եւ երկու դեմ գրանցվեց՝ Խաչատուր Քոքոբելյանն ու Թեւան Պողոսյանն էին, Էդմոն Մարուքյանը ձեռնպահ քվեարկեց, իսկ մյուս ՀՀԿ խմբակցության պատգամավորները կողմ, նրանք վեցն էին։ Այն կքննարկվի լիագումար նիստերին։ Անի Սահակյան