Այո, մեզ հետ համագործակցությունն ահաբեկիչների վերջը կտա. Էրդողան

ԱՄՆ-ի գլխավորությամբ՝ միջազգային կոալիցիան պետք է մեզ հետ ավելի համաձայնեցված գործի՝ «Իսլամական պետություն» ահաբեկչական խմբավորման վերջը տալու համար։ Նման հայտարարությամբ է հանդես եկել Թուրքիայի նախագահ Ռեջեփ Թայիփ Էրդողանը։ «Որպեսզի հաջողության հասնենք, թուրքական և ամերիկյան ուժերը պետք է համաձայնեցնեն իրենց քայլերը։ Այո, մեզ հետ համագործակցությունն ահաբեկիչների վերջը կտա։ Ես բազմիցս ասել եմ նրանց. «Եկեք միացյալ ուժերով հանդես գանք և ոչնչացնենք ԻՊ-ին։ ԱՄՆ-ն, սակայն, մտադիր է պայքարել ահաբեկիչների դեմ՝ օգտագործելով Սիրիայի քրդական «Ժողովրդավարական միություն» կուսակցությանն ու վերջինիս ռազմական թևի՝ քրդական «Ժողովրդական ինքնապաշտպանության ջոկատներին», բայց չէ՞ որ այս ուժերն ինքնին ահաբեկչական կազմակերպություններ են։ Լավ կամ վատ ահաբեկիչ կարո՞ղ է լինել։ Նրանք բոլորն էլ ահաբեկիչներ են, և նրանք բոլորն էլ վատն են։ Ես փոխնախագահ Ջո Բայդենին հարցրի. «Դուք տեղյա՞կ եք, որ ամերիկյան երկու ինքնաթիռ զենք են մատակարարել քրդերին», Բայդենը բացասական պատասխան տվեց, իսկ ես, իմ հերթին, նրան հայտնեցի, որ ինքս տեղյակ եմ։ Իրականում սա շատ ցավալի փաստ է մեզ համար։ Եթե ԱՄՆ-ն ցանկանում է ահաբեկչության վերջը տալ, ապա պետք է համագործակցի մեզ հետ»,- Էրդողանի խոսքերն է փոխանցում թուրքական «Անադոլու» գործակալությունը։