Մերկելն անհանգիստ է

ԵՄ-ն գտնվում է ծայրահեղ վիճակում և պետք է գործնականում ցույց տա փոխվելու իր ունակությունը։ Այս մասին հայտարարել է Գերմանիայի կանցլեր Անգելա Մերկելը՝ ժամանելով Բրատիսլավայում ընթացող ԵՄ ոչ պաշտոնական գագաթնաժողովին։ «Մենք ծայրահեղ վիճակում ենք։ Պետք է գործողություններով ցույց տալ, որ մենք կարող ենք դառնալ ավելի լավը անվտանգության հարցերում, ահաբեկչության դեմ պայքարում, այն հարցերում, որոնք վերաբերում են պաշտպանության ոլորտում համագործակցությանը, տնտեսական աճին և աշխատանքի շուկային»,- ասել է նա՝ փոխանցում է TASS գործակալությունը։ Նրա խոսքով՝ Սլովակիայի մայրաքաղաքում այսօր անցկացվող գագաթնաժողովից չպետք է սպասել խնդրահարույց հարցերի լուծում։ «Մենք այսօր կքննարկենք Բրատիսլավայի հռչակագիրը, և հույս ունեմ՝ կկարողանանք այն համաձայնեցնել։ Սակայն խոսքը մեկ հանդիպման ընթացքում բոլոր խնդիրներին լուծում գտնելու մասին չէ»,- ասել է նա։ Կանցլերը նաև հավելել է, որ ԵՄ պետությունների ու կառավարությունների ղեկավարները այսօր կքննարկեն միգրացիային առնչվող հարցեր և միգրացիոն ճգնաժամի պատճառների դեմ պայքարի հարցը։ «Այդ ամենը կմշակվի մինչև տարեվերջ և մինչև 2017-ի մարտ Հռոմի պայմանագրի 60-ամյակը, և մենք ցանկանում ենք հասնել հստակ առաջընթացի»,- հայտարարել է Մերկելը։