Թուրքիայում ձերբակալվել է քրդամետ կուսակցության ղեկավարի գլխավոր օգնականը

Թուրքիայում «Քուրդիստանի աշխատավորական կուսակցություն» խմբավորման դեմ իրականացվող գործողությունների շրջանակում ձերբակալվել է քրդամետ Ժողովրդադեմոկրատական կուսակցության ղեկավարի գլխավոր օգնական Ալփ Ալթընորսը: Պաշտոնյային ձերբակալել են Անկարայի իր տանը: Այս մասին գրում է թուրքական «Հաբեր Թյուրք» կայքը: Հատուկ գործողության ընթացքում ձերբակալվել է ևս 15 հոգի, որոնցից 4-ն ազատ են արձակվել՝ քաղաքից չբացակայելու պայմանով: Ժողովրդադեմոկրատական կուսակցության նախագահ Սելահաթթին Դեմիրթաշը պարբերաբար հայտարարել է, որ իրենք չեն ներկայացնում ՔԱԿ խմբավորման շահերը, այնուամենայնիվ, պետությունը պարբերաբար մեղադրում է նրանց քուրդ զինյալների հետ կապերի համար: ՔԱԿ-ը քրդական կազմակերպություն է, որի հիմնական նպատակն է զինված պայքարի միջոցով Թուրքիայի հարավ-արևելյան, Իրաքի հյուսիսային, Իրանի հյուսիս-արևմտյան և Սիրիայի հյուսիս-արևելյան տարածքներում հիմնել քրդական անկախ պետություն: Թուրք-քրդական հարաբերությունների սրման հերթական փուլը սկսվել է 2015-ի ամռանը: