Ադրբեջանը չէ, որ կարգավիճակ է շնորհելու Արցախի ժողովրդին. Է. Շարմազանով
Լեռնային Ղարաբաղի ժողովուրդն ունի նույնքան իրավունք՝ հանրաքվեի միջոցով որոշելու իր ճակատագիրը, որքան ցանկացած եվրոպական երկիր, և Ալիևը չէ, որ կարգավիճակ է շնորհելու Արցախի ժողովրդին: Այսօր Հայաստանի Հանրապետական կուսակցության Գործադիր մարմնի հերթական նիստից հետո լրագրողների հետ ճեպազրույցում ասաց ՀՀԿ խոսնակ, ԱԺ փոխնախագահ Էդուարդ Շարմազանովը: Նրա խոսքով՝ որքան տրամաբանական է Brexit-ը՝ Մեծ Բրիտանիայի հանրաքվեն՝ մնալ-չմնալ ԵՄ-ում, Շոտլանդիայի հանրաքվեն՝ մնալ-չմնալ Մեծ Բրիտանիայի կազմում, այնքան էլ տրամաբանական է ԼՂ ժողովրդի՝ սեփական ճակատագիրը հանրաքվեով որոշելը: Եվ Արցախը, նրա խոսքով՝ չի կարող ոչ մի կարգավիճակում լինել Ադրբեջանի կազմում: Նա ընդգգծեց, որ Նախիջևանը լավ օրինակ է նրա, որ Արցախը չի կարող լինել Ադրբեջանի կազմում, քանի որ ադրբեջանական տիրապետության օրոք երբեմնի հայաշատ այս տարածքում որևէ հայ չի ապրում: Նա հիշեցրեց նաև Ջուղայի խաչքարերի նկատմամբ իրականացված վանդալիզմը: Նա առաջարկում է, որ բոլորը և, առաջին հերթին, Բաքվում մոռանան, որ Արցախը կարող է մի օր լինել Ադրբեջանի կազմում: Ըստ Շարմազանովի՝ նիստին քննարկվել են արտաքին քաղաքական, ինչպես նաև ներկուսակցական հարցեր, անդրադարձ է եղել ղարաբաղյան հիմնախնդրին:
Հետևեք մեզ Viber-ում
