«Գյուլենական համայնքը, հայ հրոսակախմբերի հետ ուս ուսի տված, գործում է ընդդեմ Թուրքիայի»

22:05 - 17/հունիսի/2016

Թուրքիայի նախագահ Ռեջեփ Թայիփ Էրդողանը թուրքական անվտանգության ուժերի ներկայացուցիչների հետ հանդիպման ժամանակ «պետության ներսում զուգահեռ պետություն ստեղծել ջանացող կառույցի դեմ» պայքար մղելու համատեքստում մեղադրել է նաև հայերին՝ նշյալ կասկածելի կառույցի հետ համագործակցելու և Թուրքիայի դեմ դավադրություններ նյութելու մեջ: Այս մասին հաղորդում է ermenihaber-ը՝ հղում կատարելով թուրքական «Sabah» թերթի կայքին: «Այդ դավաճան ոհմակը աշխարհի բոլոր անկյուններում Թուրքիայի դեմ աշխատանք է տանում: Ուր էլ գնանք՝ տեսնում ենք, որ զուգահեռ կառույցի անջատողական ահաբեկչական խմբավորման ներկայացուցիչները՝ հայ հրոսակախմբերի հետ ուս ուսի տված, գործում են ընդդեմ մեր պետության: Ես անձամբ դրա ականատեսը եղա Ամերիկայում, որտեղ կոնֆերանսի պիտի մասնակցեի. այդ կառույցը «Քուրդիստանի բանվորական կուսակցության» (ՔԲԿ-PKK), հայկական ահաբեկչական խմբավորման հետ իմ անձի և իմ պատվիրակության դեմ ցույցեր կազմակերպեց»,- ասել է Էրդողանը: Թուրքիայի նախագահը խոստացել է, որ այս «հակաթուրքական» ուժերի դեմ պայքարը միայն Թուրքիայի ոստիկանության ու անվտանգության ուժերի ուսին չի մնալու և համոզմունք է հայտնել, որ թուրքական պետությունը, ի վերջո, հաղթելու է իր դեմ գործող ուժերին: Թուրքիայում զուգահեռ կառույց անվանում են ամերիկաբնակ Ֆեթուլլահ Գյուլենի գլխավորած իսլամական շարժմանը կամ որ նույնն է՝ գյուլենական համայնքին: