Վտանգավոր է հիմնական սլաքը Թուրքիայից Գերմանիա ուղղելը. փորձագետ

Միջազգային  իրավունքի  փորձագետ  Վլադիմիր  Վարդանյանն այսօր լրագրողների հետ զրույցում տեղեկացրեց, որ թուրք փաստաբան Մելիհ Աքքուրթը դիմել է Գերմանիայի Սահմանադրական դատարան Բունդեսթագի կողմից Հայոց ցեղասպանությունը ճանաչող բանաձևը չեղյալ համարելու հայցով: «Գերմանական սահմանադրական արդարադատության համակարգի առանձնահատկություններից մեկն այն է, որ վերջինը բարձր ընդունելության շեմ է նախատեսում համապատասխան դիմումների համար և հաջողության հասնել ցանկացող անձն առնվազն պետք է հիմնավորի, որ այդ փաստաթուղթը խախտել է Սահմանադրությամբ երաշխավորված մի շարք իրավունքներից մեկը և պնդի, որ փաստաթուղթն այդ առումով չի համապատասխանում Գերմանիայի հիմնական օրենքին և պետք է վերանայվի: Այս պարագայում մենք չունենք նման խնդիր, որովհետև բանաձևը խորհրադարանական է,  այն չի կարող ներգործություն ունենալ անձի նկատմամբ, խախտել նրա իրավունքները»,- ասաց  փորձագետը՝ նշելով նաև, որ Հայոց ցեղասպանությունը ճանաչող բանաձևն ունի նաև բացասական կողմ: Ըստ նրա՝ բանաձևում ավելի շատ խոսվում է Գերմանիայի անգործության, Հայոց ցեղասպանությունը չկանխելու,  ոչ թե մեղսակցության մասին ևվտանգավոր է այն հանգամանքը, որ հիմնական սլաքը Թուրքիայից Գերմանիա է ուղղվում: