Միքայել Մելքումյանը`ՌԴ-ի հետ ՀՕՊ համաձայնագրի մասին.լրացուցիչ տեխնիկական բաղադրիչ է ավելանում
«Կանխավ չեմ ուզում կասկածի տակ դնել կառավարության ղեկավարի մտադրությունը, որովհետև փետրվարի տասնվեցին տասը կետանոց գրավոր փաստաթուղթ եմ հղել ես կառավարությանը, որից ութ կետը հնչեցվել է: Կառավարության ղեկավարը զուգահեռ ասում է, որ քաղաքական կամք ունենք, բայց ես էլ ասում եմ, որ պայման պետք է լինի, որ իրացվի այդ քաղաքական կամքը, ես չգիտեմ այդ պայմանները կա՞ն, թե ոչ»,- ԱԺ ճեպազրույցների ժամին հայտարարեց ԱԺ «Բարգավաճ Հայաստան» խմբակցության պատգամավոր Միքայել Մելքումյանն՝ անդրադառնալով կառավարության՝ մենաշնորհների, կոռուպցիայի դեմ պայքարին: Անդրադառնալով Ռուսաստանի հետ ՀՕՊ համաձայնագրին, պատգամավորն ասաց. «Այստեղ պետք չի երկու բան խառնել, մեր հակաօդային պաշտպանության համակարգը մնում է, և լրացուցիչ տեխնիկական բաղադրիչ է ավելանում, որը մենք չունենք, ինչը բերում է ի օգուտ մեզ՝ տեսանելիության դաշտի ընդլայնման, մենք լիազորություն չենք պատվիրակում»։ Ինչ վերաբերում է ՏԻՄ ընտրություններին՝ հատկապես Գյումրիում և Վանաձորում, Միքայել Մելքումյանն ասաց, որ վերջնական որոշում չկա, թե ում թեկնածությունը կպաշտպանեն, քանի որ դեռ վաղ է ասել, բայց մասնակցելու են ընտրություններին.«Հզոր կառույց ունենք Գյումրիում»:
Հետևեք մեզ Viber-ում
