Գողթի շինարարությունը կասեցված է անորոշ ժամկետով. գողթեցիները հաղթեցին
Այսօր՝ հունիսի 7-ին, Երևան-Գողթ ճանապարհը մոտ 2 ժամ փակելու ու գյուղացիներ-շինարարներ բանակցութունների արդյունքում հայտարարվեց, որ շինարարությունը դադարեցվում է, մինչև որ վերջնականապես կլուծվի ջրամբարի ճակատագիրը: Գյուղացիները սիրով ճանապարհից հավաքեցին քարերը: Հիշեցնենք, որ Գողթ գյուղի հողերը ոռոգվում են Գեղարդալճից, որից կառավարությունը պատրաստվում է ջուր տալ այլ գյուղեր, մինչդեռ գողթեցիների խոսքով՝ իրենց լճի ջուրը հազիվ է հերիքում: Գեղարդալճի ջրամբարի նախագծի ղեկավար Վաչիկ Սահակյանը մինչ այդ գյուղացիներին վստահեցնում էր, որ հաշվարկները հստակ են, բոլորին ջուրը կհերիքի: Գյուղացիները շարունակում էին պնդել, որ չեն հավատում: Կողմերը չկարողացան իրար համոզել, բայց անսպասելի հայտարարությունից հետո շինարարությունը կասեցվում է. կրքերը մարեցին: Ինչպես ավելի վաղ Գողթից հայտնել էր ֆոտոլրագրող Գագիկ Շամշյանը, լարված ու պայթյունավտանգ իրավիճակ էր ստեղծվել Գողթում: Գյուղացիները ի նշան բողոքի՝ փակել էին ճանապարհը և հրաժարվում էին այն բացել՝ արդարացիորեն բարձրաձայնելով, որ վարչապետ Հովիկ Աբրահամյանը օրեր առաջ Գառնիի գյուղացիների հետ հանդիպման ժամանակ խոստացել է, որ կառավարությունը կքննարկի գողթեցիների բարձրացրած հարցը՝ կապված Գեղարդալճի հետ և այդ ժամանակ գողթեցիները ժամանակավորապես դադարեցրել էին իրենց բողոքի ակցիաները: Ֆոտոլրագրողի հետ զրուցյում նրանք ասել էին. «Մենք պայքարելու ենք մինչև վերջ և թող վարչապետ Հ. Աբրահամյանն ու Կոտայքի մարզպետ Կ. Գուլոյանը վերցրեն իրենց հսկողության տակ և կատարեն իրենց տված խոստումը, այն է՝ մինչև շինարարական աշխատանքներ սկսելը մասսայական քննարկեն գողթեցիների հետ»: Գյուղ էին ժամանել ոստիկանության Կոտայքի մարզային վարչության աշխատակիցները՝ մարզի ոստիկանապետ Լայերտ Գրիգորյանի և ոստիկանության Կոտայքի բաժնի օպերատիվ խումբը՝ Կոտայքի ոստիկանապետ Վարդան Վարդանյանի գլխավորությամբ: Լուսանկարը՝ Գագիկ Շամշյանի
Հետևեք մեզ Viber-ում
