ՀԱՊԿ-ից գերագնահատված սպասումներ պետք է չունենալ. Ռոբերտ Քոչարյան

  ՀՀ երկրորդ նախագահ Ռոբերտ Քոչարյանը այսօր իր՝ 2rd.am ոչ պաշտոնական կայքին հարցազրույց է տվել, որում խոսել է վերջին շրջանում Հայաստանում և Արցախում տեղի ունեցող իրադարձությունների վերաբերյալ։ Քոչարյանն անդրադարձել է նաև ՀԱՊԿ-ին և ԵԱՏՄ-ին՝ Հայաստանի անդամակցությանը։ «ՀԱՊԿ որոշ երկրների գործողություններն, ըստ էության, անհամատեղելի են ռազմական դաշինքում մեր ընդհանուր անդամակցության հետ: Ակնհայտ է, որ այդ երկրների շահերը մենք չենք փոխի, բայց լուրջ հետևություններ անել պարտավոր ենք: ՀԱՊԿ-ն ասիմետրիկ կառույց է, որի առանցքը հանդիսանում են Ռուսաստանի ռազմաքաղաքական շահերը՝ մասնակից պետություններից յուրաքանչյուրի շահերի հետ ինքնուրույն և առանձին շաղկապվածությամբ: Որևէ արտահայտված համընդհանուր շահ այստեղ չկա: Որտե՞ղ են մեր ընդհանուր ռազմաքաղաքական հետաքրքրություններն, օրինակ, Ղազախստանի կամ Ղրղզստանի հետ»,- ասել է Քոչարյանը։ Նրա խոսքով՝ պետք է ճիշտ հասկանալ, թե ինչ է իրենից ներկայացնում ՀԱՊԿ-ը և գերագնահատված սպասումներ չունենալ այդ կազմակերպությունից. «Միամտություն կլինի կարծելը, թե համատեղ անդամակցությունը ՀԱՊԿ-ին կարող է գերակշռել Թուրքիայի և Ադրբեջանի հետ Ղազախստանի ձևավորված փոխհարաբերություններին: Այս պատճառով էլ ՀԱՊԿ-ը պետք է դիտարկել Ռուսաստանի հետ ռազմաքաղաքական և ռազմատեխնիկական համագործակցության համատեքստում: Այդպիսին է իրականությունը, և դա չի կարելի հաշվի չառնել»։