«Ֆանտաստիկ է». Շարմազամովը՝ Նժդեհի արձանի մասին
Երևանի Վերնիսաժի հարևանությամբ Նժդեհի արձանի բացմանը հանդիսավոր արարողության ժամանակ այսօր հաղորդավարը Հայաստանի Հանրապետական կուսակցության խոսնակ Էդուարդ Շարմազանովին ներկայացրեց որպես նժդեհագետ: Լրագրողների հարցին, թե արդյո՞ք այսօրվա իշխանությունները շարժվում են Նժդեհի թողած պատգամներին համաձայն, Էդուարդ Շարմազանովը պատասխանեց. «Համենայն դեպս գնում ենք այդ ուղղությամբ, Արցախյան հերոսամարտն ու ապրիլյան պատերազմում մեր զինվորների սխրանքները ապացուցում են, որ նրանք Նժդեհի հետնորդներն են»: Էդուարդ Շարմազանովը հակադարձեց կարծիքներին, թե Նժդեհի արձանը նման չէ Նժդեհին, այլ նման է Պետրոս Առաջինին: «Այս արձանը ֆանտաստիկ արձան է, և այս օրը հիշեք, այս արձանը լինելու է հայ ժողովրդի ամենասիրելի արձաններից մեկը»,- հավաստիացրեց նա: Հարցին, թե համարո՞ւ է որ արձանն առնական է, ինչպես նշել էր քաղաքապետի տեղակալ Կամո Արեյանը, Էդուարդ Շարմազանովը նշեց. «Կոմպլեքս արձան է, որի մեջ վերցված է Նժդեհի ողջ կերպարը, թե՛ որպես ազգային բարոյախոս, թե՛ որպես պետական գործիչ, թե որպես զինվորական, թե՛ որպես ուսուցիչ»:
Հետևեք մեզ Viber-ում
