Այսօր Շառլ Ազնավուրի ծննդյան օրն է

Շառլ Ազնավուր, տոհմական անունը՝ Շահնուր Ազնավուրյան, ծնվել է 1924-ին Փարիզում: Իննամյա Շառլն արդեն երգել և նվագել է բեմում, 12 տարեկանում առաջին անգամ նկարահանվել է ֆիլմում: Սկզբում նա ելույթ է ունեցել կոմպոզիտոր Պիեռ Ռոշի հետ, այնուհետև նրանց նկատել է հանրահայտ Էդիտ Պիաֆը, և Ազնավուրն ու Ռոշը 1946-ին մասնակցել են նրա համերգային շրջագայությանը Ֆրասիայում և ԱՄՆ-ում: Այդ ժամանակից սկսած՝ Շառլը սկսել է շանսոնյեի իր կարիերան: Նա երկար ժամանակ անպատասխան սիրով սիրել է Պիաֆին. Պիաֆը եղել է նրա ընկերը, մուսան և սերը: 1960-ականների սկզբին Ազնավուրն արդեն բավականին ճանաչված էր, ելույթ էր ունենում հայտնի համերգասրահներում: Ավելի ուշ, Ֆրենկ Սինատրայի «Reprise Records» ֆիրման թողարկեց նրա առաջին ձայնասկավառակը: Իր ստեղծագործական կարիերայի ընթացքում Ազնավուրը անթիվ երգերի հեղինակ է դարձել, որոնցից շատերը հաճույքով կատարել են համաշխարհային այնպիսի աստղեր, ինչպիսիք են Ռեյ Չարլզը, Լայզա Մինելին, Բոբ Դիլանը, Խուլիո Իգլեսիասը: Ազնավուրը բազմիցս զուգերգով հանդես է եկել Ֆրենկ Սինատրայի, Սելին Դիոնի, Լուչիանո Պավարոտտիի, Պլասիդո Դոմինգոյի, Պատրիսիա Կաասի և այլոց հետ: Համաձայն CNN-ի և Time ամսագրի հարցումների՝ Շառլ Ազնավուրը համարվում է 20-րդ դարի լավագույն էստրադային կատարողը: Նա նաև հանճարեղ դերասան է և մի շարք գրքերի հեղինակ: Շառլ Ազնավուրը մեծ երախտիք ունի նաև հայ ժողովրդի կյանքում. 1988-ի երկրաշարժից հետո նա մեծ ներդրում արեց երկրաշարժից տուժած բնակավայրերի վերականգնման գործում: 2009-ից Ազնավուրը համարվում է Շվեյցարիայում Հայաստանի դեսպանը և Հայաստանի ներկայացուցիչը ՄԱԿ-ի կենտրոնակայանում: Արժանացել է բազմաթիվ կոչումների: Այսօր Շառլ Ազնավուրն ապրում և աշխատում է Շվեյցարիայում, սակայն, ինչպես միշտ՝ իրեն հայ և ֆրանսիացի է համարում: