Իշխանության ներսում անվստահության ճգնաժամը խորանում է

Այսօր Ազգային ժողովում անսպասելի քվեարկություն տեղի ունեցավ․ իշխանական խմբակցության ներկայացուցիչ Աննա Կարապետյանի ներկայացրած նախագիծը տապալվեց հենց նույն խմբակցության պատճառով։ Կարապետյանը համապատասխան օրենքներում փոփոխություններով առաջարկում էր, որ ԱԺ նախագահ Արարատ Միրզոյանին հնարավորություն ընձեռվի մասնակցել Անվտանգության խորհրդի նիստերին:

Արարատ Միրզոյանին ԱԽ խորհրդի կազմ ընդգրկելու նախագծին կողմ քվեարկեց 66 պատգամավոր, դեմ՝ 14, ձեռնպահ՝ 20: Դեմ էին Լուսավոր Հայաստան խմբակցության պատգամավորները, քանի որ նրանց առաջարկը, որ այդ նիստերին մասնակցեն նաեւ խմբակցության ղեկավարները, իշխանությունը մերժել էր։ ԲՀԿ-ականներն էլ ձեռնպահ էին։

Թվում էր, թե 88 հոգանոց «Իմ քայլը» միայնակ կարող էր ապահովել 81 ձայն, նույնիսկ այն պարագայում, երբ վեց պատգամավոր գործուղման էին, բայց չեղավ այդպես։ Բացակայում էին Ռուբեն Ռուբինյանը, Լուսինե Բադալյանը, Հովհաննես Իգիթյանը, Արման Բոշյանը, Արման Եղոյանը, Թագուհի Ղազարյանը, Սոնա Ղազարյանը, Սուրեն Գրիգորյանը, Նարեկ Զեյնալյանը, Սիսակ Գաբրիելյանը, Տաթևիկ Հայրապետյանը, Արուսյակ Ջուլհակյանը, Ռուստամ Բաքոյանը, Լիլիթ Մակունցը, Հրաչյա Հակոբյանը, Տաթևիկ Գասպարյանը, Արգիշտի Մեխակյանը, Սերգեյ Մովսեսյանը, Թագուհի Թովմասյանը (չի քվեարկել), Արեն Մկրտչյանը, Վաղարշակ Հակոբյանը, Լիլիթ Ստեփանյանը, Սոֆյա Հովսեփյանը, Արմեն Խաչատրյանը: Բացակա պատգամավորներից, ինչպես նշեցինք, վեցն էին գործուղման։

Քվեարկությունից հետո իշխանության ներսում մեծ բոլոլա սկսվեց, Հակոբ Սիմիդյանին ու Սիփան Փաշինյանին Արարատ Միրզոյանը կանչեց իր աշխատասենյակ պարզաբանումներ պահանջելու։ Թեժ քննարկումից հետո պատգամավորները լրագրողներին ասացին, որ պետք չէ ողբերգություն սարքել, իրենց պատգամավորներն ուշացել են, դրա համար էլ նախագիծը տապալվել է։ Նշենք, որ քվեարկությունից հետո բացակա պատգամավորների մեծ մասը եկան խորհրդարան, ամեն մեկը մի պատճառաբանություն բերեց, թե ինչու էին ուշացել։

Նշենք նաեւ, որ կառավարությունը դրական եզրակացություն էր տվել նախագծին, սակայն այնքան էլ կողմ չէր քաղաքական մեծամասնության նման առաջարկին, քանի որ կառավարությունից հիշեցրել էին, որ անվտանգության խորհուրդը գործադիր իշխանության լիազոր մարմին է, և պետք է խորհրդին անդամակցեն գործադիր իշխանության ներկայացուցիչները:
Այս քվեարկությունը ցույց տվեց, որ իշխանության ներսում ամեն ինչ հաշտ ու համերաշխ չէ եւ Արարատ Միրզոյանը չունի լիակատար աջակցություն իր ղեկավարած հիմնարկում։ Նիկոլ Փաշինյանն էլ թեեւ արտաքուստ համաձայնություն է հայտնել նախագծին, բայց ներքուստ դեմ է Միրզոյանի մասնակցությանը։

Անի Սահակյան