Պահանջում են դադարեցնել բռնապետի հետ բանակցությունները

Եվրամիությունը պետք է դադարեցնի բանակցությունները Ադրբեջանի հետ Բաքվում ցուցարարների հանդեպ ուժի կիրառման պատճառով: Այս մասին ասվում է Եվրախորհրդարանի Սոցիալիստների և դեմոկրատների առաջադեմ ալյանսի խմբի (S&D) հայտարարության մեջ: S&D-ի արտաքին քաղաքականության հարցերով փոխնախագահ Քեթի Փիրին ասել է, որ Բաքվում խաղաղ ցույցի ճնշումը վկայում է այն մասին, որ Իլհամ Ալիևի ռեժիմը արհամարհում է խոսքի ազատության, խաղաղ հավաքների սահմանադրական իրավունքը և միջազգային պարտավորվածությունները:

«Բացի այդ բռնություններն ուղեկցվել են պետության կողմից հովանավորվող զրպարտչական բնույթի արշավով ընդդեմ ընդդիմության և քաղհասարակության ակտիվիստների, այդ թվում՝ աննախադեպ հարձակումներ են իրականացվել են ԵՄ դիվանագետների վրա, որոնք իրենց մասնագիտական գործունեություն են իրականացրել»,- ըստ aravot.am-ի՝ ասել է Քեթի Փիրին՝ ընդգծելով, որ կին ակտիվիստների հանդեպ բռնությունները, որոնք հավաքվել էին ուշադրություն հրավիրելու գենդերային բռնության վրա, ցույց է տալիս Ադրբեջանի կառավարության կեղծավոր վերաբերմունքը գենդերային հավասարության հարցում:

S&D-ի արտաքին քաղաքականության հարցերով համակարգող Տոնինո Պիկուլան իր հերթին ԵՄ արտաքին հարաբերությունների և անվտանգության քաղաքականության հարցերով բարձր ներկայացուցիչ Ֆեդերիկա Մոգերինիին և Եվրահանձնաժողովին կոչ է արել դադարեցնել նոր համաձայնագրի շուրջ բանակցություններն Ադրբեջանի հետ: «Ադրբեջանի իշխանությունները, վերջապես, պետք է հարգեն հավաքների ազատությունը, դադարեցնեն քաղաքացիական հասարակության ապամոնտաժումը և ազատ արձակեն բոլոր խաղաղ ցուցարարներին, իրավապաշտպաններին կամ քաղբանտարկյալներին, որոնք շարունակում են մնալ կալանքի»:

Ավելի վաղ Եվրամիությունը Ադրբեջանի իշխանություններին կոչ է արել հետաքննել մի քանի տասնյակ մարդկանց ձերբակալությունը, որոնք նախօրեին փորձել են խաղաղ բողոքի ցույց անցկացնել երկրի մայրաքաղաք Բաքվում:

Իր հերթին Human Rights Watch իրավապաշտպան կազմակերպությունը քննադատել է Ադրբեջանի իշխանություններին և փաստել, որ հոկտեմբերի 19-ին և 20-ին այս երկրի իշխանությունները բռնի ուժով ցրել են խաղաղ ցույցերը, որոնք անցկացվել են Բաքվի կենտրոնական հրապարակում: Իրավապաշտպան կազմակերպությունը կոչ է անում ազատ արձակել բողոքի ցույցերի ընթացքում ձերբակալված ակտիվիստներին, ինչպես նաև հետաքննել ոստիկանների կողմից անհամաչափ ուժի կիրառման մասին տեղեկությունները: «Ադրբեջանի իշխանությունները ևս մեկ անգամ ցույց տվեցին, որ անտեսում են խաղաղ հավաքներ անցկացնելու մարդկանց իրավունքը:

Իշխանությունները պետք է անհապաղ ազատ արձակեն ձերբակալվածներին»,-ասել է HRW-ի Եվրոպայի և Կենտրոնական Ասիայի գծով պատասխանատու Գեորգի Գոգիան: Նրա խոսքով՝ թեպետ ցույցերը արտոնված չէին, բայց ոստիկանությունը չպետք է ուժ կիրառեր ցույցի մասնակիցների հանդեպ, որոնք ոչ մի վտանգ չէին ներկայացնում: «Հավաքների ազատությունը հիմնարար իրավունք է և Ադրբեջանի իշխանությունները պարտավոր են հանդուրժել բողոքի խաղաղ ցույցերը անգամ Բաքվի կենտրոնում»,-հավելել է նա:

Չնայած պարբերաբար արևմտյան կառույցներից հնչում է քննադատություն Ադրբեջանի նախագահի հասցեին, այնուամենայնիվ, ԵՄ-ն շարունակում է լոյալություն ցուցաբերել, և բանակցել Ադրբեջանի նախագահի հետ: Ամեն դեպքում, դրական է, որ Ալիևի ուղղությամբ քննադատությունը ուժգնանում է արևմուտքի կողմից: Բռնապետական Ադրբեջանի ղեկավարին պարբերաբար պետք է սթափեցնել:

Թամար Բագրատունի