Քոչարյանին տեսակցելու հրամայականը. Ինչ կորոշի Փաշինյանը

Երևանի ընդհանուր իրավասության դատարանն դատավոր Աննա Դանիբեկյանի նախագահությամբ, մերժեց ՀՀ երկրորդ նախագահ Ռոբերտ Քոչարյանի կալանքը վերացնելու պաշտպանների միջնորդությունը։ Սեպտեմբերի 7-ին Քոչարյանի փաստաբանական թիմը միջնորդել էր վերացնել նախագահի խափանման միջոց կալանքը և դադարեցնել նրա նկատմամբ քրեական հետապնդումը։

Ռոբերտ Քոչարյանի պաշտպանական խումբը նախկին նախագահի խափանման միջոցի փոփոխության վերաբերյալ մեկ այլ միջնորդություն ներկայացրեց՝ այս անգամ դատարանին խնդրելով որպես խափանման միջոց կիրառել գրավ։Պաշտպաններից Հովհաննես Խուդոյանը նշեց, որ գրավի չափը կարող է որոշել դատարանը։«Մենք գտնում ենք, որ դատավարության այս փուլում պարոն Քոչարյանի նկատմամբ կալանք կիրառելու համար անհրաժեշտ հիմքերը բացակայում են»,-հայտարարեց Խուդոյանը։ Դատարանը հեռացավ խորհրդակցական սենյակ։ Ռոբերտ Քոչարյանին գրավով ազատելու միջնորդության վերաբերյալ որոշումը դատարանը կհրապարակի սեպտեմբերի 20-ին, ժամը 17:00-ին։

Կար սպասում, որ ՌԴ նախագահ Վլադիմիր Պուտինի այցից առաջ Քոչարյանի կալանքը չեղարկելը հնարավորություն կտա Փաշինյանին ինչ-որ առումով վերականգնել հայ–ռուսական հարաբերություններում առկա լարվածությունը, որը, հասկանալի պատճառներով, պայմանավորված է նաև ՀՀ 2–րդ նախագահի դեմ իրականացվող քաղաքական հետապնդմամբ։ Խնդիրն այստեղ ամենեւին էլ անձնավորված չէ, այո կա տեսակի նմանության հարց եւ Պուտին-Քոչարյան վաղեմի ընկերություն, բայց փաստն այն է, որ այդ հարաբերություններն ուղիղ արտացոլում են ստանում հայ-ռուսական հարաբերությունների վրա: Սակայն Նիկոլ Փաշինյանը չօգտվեց այդ հնարավորությունից, միգուցե սեպտեմբերի 20-ին այնուամենայնիվ Քոչարյանին ազատելու ուժ գտնի իր մեջ, հակառակ պարագայում կարելի է սպասել տնտեսական ու քաղաքական հերթական սանկցիաների հերթական դոզան Ռուսաստանից: Ինչպես հայտնի է Պուտինի հոկտեմբերմեկյան այցի նպատակը ԵԱՏՄ բարձրագույն տնտեսական խորհրդի նիստին մասնակցելն է, որն այս անգամ տեղի կունենա Հայաստանում եւ որին մասնակցելու են ԵԱՏՄ անդամ երկրների բոլոր ղեկավարները: Չի բացառվում, որ նիստը կրկին տեղափոխվի Մոսկվա: Իսկ եթե ոչ, ապա Հայաստանում Քոչարյանին ցանկացած գնով տեսակցելու հարցն է Պուտինը դնելու:

Սակայն սա կլինի չարյաց փոքրագույնը, ավելի դաժան փորձություն է սպասվում տնտեսական սանկցիաների տեսքով՝ գազի գնի բարձրացումից սկսած, Հայաստանից Ռուսաստան արտահանվող ապրանքների առջեւ դրվելիք խոչընդոտներից ու տրանսֆերներից վերջացած:

Անի Սահակյան