Գողական աշխարհը պատերազմ է հայտարարում
Կառավարությունը օգոստոսի 29-ին հաստատել է ՀՀ քրեական օրենսգրքում լրացումներ կատարելու մասին համապատասխան նախագիծը։ Նախատեսվում է քրեական պատասխանատվության ենթարկել քրեական աստիճանահարթակով բարձրագույն կարգավիճակ տալու, ստանալու կամ պահպանելու համար, ինչպես նաև քրեական ենթամշակույթ ստեղծելու, ղեկավարելու, մասնակցելու, ներգրավվելու ու պահպանելու համար։ Ինչպես Նիկոլ Փաշինյանն էլ ավելի մանրամասնել՝ կարգելվեն սխոդկաները, գողական հավաքները եւ այլն:
Այս նախագիծը հանցաշխարհն ընդունեց իբրեւ մարտահրավեր, քանի որ դրանով ըստ ամենայնի փորձ է արվելու փակել <<օրենքով գողերի>> օդերը: Մենք օրերս անդրադարձել էինք այս նախագծին եւ գրել, որ գողականները վրդովված են, ասում են, որ նախագիծը Նիկոլ Փաշինյանին կալանավայրում ճնշած մեկ-երկու գողերի դեմ է, մասնավորապես Զապի ու Լեննականցի Սուրոյի, բայց արդյունքում տուժելու են բոլորը: Եւ, ահա, դժհոգությունները պայթեցին սեպտեմբերի 5-ին: Առանձին ՔԿՀ-ներում արձանագրվել էին անհնազանդության դրսևորումներ։ Կալանավորները հարվածել էին դռներին, ջարդել են կերակրադռնակները, ապա այրվող առարկաներ են նետել պատուհանից դուրս, ինչի հետևանքով հրդեհվել է ՔԿՀ–ներից մեկի հարակից խոտածածկ տարածքը։ Իրավիճակն այնքան է լարվել, որ մեկ օրում ՔԿՀ պետերի փոփոխություններ եղան: Հիմա հարաբերական անդորր է, ըստ տեղեկությունների ՔԿՀ պետերից մի քանիսը հանդիպել են ոչ կալանավայրում գտնվող օրենքով գողերին եւ բանակցել՝ գաղութներում անդորր պահպանելու համար: Խնդիրն այն է, որ ՔԿՀ-ներում բողոքի ակցիաները հրահրվում կամ թելադրվում են օրենքով գողերի կողմից, նրանք այսպիսով իշխանություններին իրենց բողոքն են հղում:
Տեղեկություններ կան, որ սրանք դեռ առաջին ծիծեռնակներն են, հանցաշխարհը պատրաստվում է իշխանության դեմ մեծ պատերազմի: Իսկ այդ պատերազմը կարող է գողականից վերածվել նաեւ քաղաքականի: Ինչպես շատ երկրներում, ի մասնավորի Վրաստանում, երբ հայտնի հեղափոխության ժամանակ գողականները դարձան քաղաքական ֆակտոր:
Հետեւապես Նիկոլ Փաշինյանը բարդ փորձության առջեւ է կանգնած: Կամ պետք է հագուրդ տա օրենքով գողերի պահանջներին, գնա նրանց հետ կոմպրոմիսի եւ նրանց նկատմամբ ոչ թե մկրատ, այլ բլիթ կիրառի, կամ պետք է պատրաստ լինի հեղափոխական ալիքի, որի մեկնարկը կտրվի ՔԿՀ-ներից:
Անի Սահակյան
Հետևեք մեզ Viber-ում
