Պուտին-Մակրոն քննարկում. Արցախում լարվածության բռնկման կանխատեսում

Ռուսաստանի և Ֆրանսիայի նախագահները Ֆորտ Բրեգանսոնում հանդիպման ընթացքում քննարկել են տարածաշրջանային հակամարտությունները, այդ թվում՝ Լեռնային Ղարաբաղի կոնֆլիկտը:

Վլադիմիր Պուտինի և Էմանուել Մակրոնի բանակցությունները եղել են հագեցած, կառուցողական և վստահելի, տեղեկացրել է ՌԴ նախագահի մամլո խոսնակը։ Նախագահները հանդիպման ընթացքում քննարկել են մի շարք թեմաներ: Քննարկվող հիմնական թեմաները եղել են նորմանդական ձևաչափով գագաթնաժողովի անցկացման հեռանկարները, Սիրիայում տիրող իրավիճակը, տարածաշրջանային խնդիրները և այլն: Վլադիմիր Պուտինն ու Էմանուել Մակրոնը քննարկել են նաև Լեռնային Ղարաբաղի խնդիրը:

Երկու նախագահների հանդիպման ու բանակցությունների մասին Վլադիմիր Պուտինի խոսնակ Դմիտրի Պեսկովը պատմել է. «Վլադիմիր Պուտինն ու Էմանուել Մակրոնը մտքեր են փոխանակել Սիրիայում իրավիճակի մասին՝ անդրադառնալով թե՛ սահմանադրական կոմիտեի ձևավորմանը, թե՛ կարգավորման հեռանկարներին, թե՛ փախստականների վերադարձին: Անդրադարձ է կատարվել նաև բազմաթիվ այլ տարածաշրջանային խնդիրների՝ Բալկաններ, Ղարաբաղ, զրուցել են նաև կլիմայի մասին: Ընդհանուր առմամբ բանակցությունները դրական են եղել»:

Պուտին-Մակրոնը հանդիպմանը տարածաշրջանային հակամարտությունները, այդ թվում՝ Լեռնային Ղարաբաղյան հակամարտությունը քննարկելը, թերևս, ուշագրավ նորություն է։
ԵԱՀԿ Մինսկի խմբում համանախագահող երկու պետությունների ղեկավարները ըստ ամենայնի ունեն քննարկելու առիթ։ Ինչը դա կարող է լինել․․․

Թե՛ Պուտինը, թե՛ Մակրոնը հանդիպել են, վստահաբար քննարկել են ղարաբաղյան կարգավորման թեման Փաշինյանի հետ, ծանոթ են նրա պատկերացումներին։ Բանն այն է, որ այժմ, միջնորդները զգում են, որ իրենց՝ կառուցողական բանակցությունները շարունակելու ձգտումներին զուգահեռ կողմերի դիրքորոշումը բավական հեռու են փոխզիջումային լինելուց, թեև Փաշինյանի իշխանության գալուց հետո, թվում էր, թե բանակցային գործընթացին նոր թափ հաղորդելու հնարավորություն է ստեղծվել։

Ըստ ամենայնի Պուտինն ու Մակրոնը որոշակիորեն մտահոգված են ղարաբաղյան կարգավորման շուրջ ստեղծված իրավիճակով, եւ նրանք հարկ են համարել ոչ միայն այդ հարցը քննարկել, այլեւ հրապարակայնացնել այդ տեղեկությունը։

Չի բացառվում, որ Պուտինն ու Մակրոնը որոշ համաձայնությունների եկած լինեն։

Թամար Բագրատունի