Բազմահազարանոց հանրահավաք ընդդեմ Պուտինի, բայք-շոու՝ նրա մասնակցությամբ

Անկախ դիտորդների տվյալներով Մոսկվայում օգոստոսի 10-ին անցկացված հանրահավաքին մինչև 60000 մարդ է մասնակցել։ Ոստիկանությունը, մինչդեռ, պնդում է, որ ցուցարարների թիվը չի անցել 20,000-ից։

Ըստ «Ազատության»՝ 2011թ․-ից ի վեր Մոսկվայում անցկացվող այս ամենաբազմամարդ հանրահավաքով ընդդիմադիրները պահանջում էին թույլ տալ անկախ թեկնածուներին մասնակցել Մոսկվայի դումայի առաջիկա ընտրություններին։ Հանրահավաքը պաշտոնապես արտոնված էր քաղաքային իշխանությունների կողմից, սակայն հարյուրավոր ցուցարարներ հավաքվել էին նաև քաղաքի այլ հատվածներում, նրանցից շատերը՝ Ռուսաստանի նախագահի նստավայրի մոտ, ինչին հակազդելով՝ ոստիկանները բերման են ենթարկել 256 քաղաքացու։

Ռուսաստանի կենտրոնական ընտրական հանձնաժողովը շաբաթներ առաջ հրաժարվել է գրանցել մի խումբ ընդդիմադիրների թեկնածությունը սեպտեմբերի 8-ին անցկացվելիք Մոսկվայի քաղաքային դումայի ընտրություններում, ինչը բողոքի աննախադեպ ալիք է բարձրացրել։

Օգոստոսի 10-ին ոստիկանությունը նաև 79 քաղաքացու բերման է ենթարկել Սանկտ Պետերբուրգում, 13-ին՝ Դոնի Ռոստովում, 2 հոգու՝ Բրյանսկում, ևս 2-ին՝ Սիկտիվկարում, որտեղ, ի նշան մոսկովյան հանրահավաքի հետ համերաշխության, նույնպես հանրահավաքներ են անցկացվել։

Անկախ թեկնածուների գրանցման պահանջով Մոսկվայում անցած շաբաթներին բողոքի մարդաշատ ցույցեր են տեղի ունեցել, որոնք, սակայն, ավարտվել են հարյուրավոր ձերբակալություններով և ոստիկանական բիրտ ուժի գործադրմամբ մարդկանց ցրելով։
Մինչ Մոսկվայում 60000-անոց բողոքի ցույց էր տեղի ունենում՝ Ռուսաստանի նախագահ Պուտինը Ղրիմ ժամանեց օգոստոսի 10-ին։ Սևաստոպոլում նա մասնակցում էր բայք-շոուին, որին ներկայացել է մոտոցիկլետով:

Ուկրաինան դատապարտում է Ռուսաստանի նախագահ Վլադիմիր Պուտինի այցը բռնակցված Ղրիմ և Սևաստոպոլ: Ուկրաինայի դիվանագիտական գերատեսչությունը հայտարարել է, որ այդ այցը, ինչպես նաև նախորդ բոլոր՝ Ուկրաինայի հետ չհամաձայնեցված այցերը բռնակցված Ղրիմ, Ուկրաինայի տարածքային ամբողջականության և ինքնիշխանության կոպիտ խախտում են:

Մետաքսյա Շալունց