Մոսկվայում իրավիճակ կարող է փոխվել

«Լևադա» կենտրոնի անցկացրած հարցումների համաձայն, հարցմանը մասնակցած մոսկվացիների 37 տոկոսը դրական է գնահատել Մոսկվայի օրենսդիր մարմնի ընտրություններին անկախ թեկնածուների գրանցման պահանջով բողոքի ակցիաները, 27 տոկոսն ասել է, որ բացասական է վերաբերվում, իսկ 30 տոկոսն անտարբեր է։ Երկու տոկոսն ասել է, որ մասնակցում է այդ ցույցերին, իսկ ինը տոկոսը՝ հնարավոր է մասնակցի։

Հարցվածների 29 տոկոսը նշել է, որ ուշադրությամբ հետևում է այդ ակցիաներին, 48 տոկոսն էլ՝ լսել է ակցիաների մասին։

Ի դեպ, նկատեցինք, որ այս ամենը տեղի է ունենում այն պայմաններում, երբ Ռուսաստանի դաշնային հեռուստաընկերություններն այդ ակցիաներն ընդհանրապես չեն լուսաբանում։

Հիշեցնենք, որ Մոսկվայում բողոքի ցույցերը տեղի են ունենում հուլիսի կեսերից։ Հուլիսի 27-ի և օգոստոսի 3-ի ակցիաներն արտոնված չէին, և ոստիկանությունը բռնություն կիրառեց Մոսկվայի կենտրոնական փողոցներ դուրս եկած ցուցարարների նկատմամբ՝ ձերբակալելով հազարավոր մասնակիցների։ Մի շարք քաղաքացիների նկատմամբ Քննչական կոմիտեն նույնիսկ քրեական գործեր հարուցեց, իսկ մանկահասակ երեխայի հետ ցույցերին մասնակցած մոսկվացի ամուսիններին սպառնացին զրկել ծնողական իրավունքից։

Նկատենք, որ Ռուսաստանում իրավապահների կոշտ գործելաոճը բուռն քննադատվեց Արևմուտքի կողմից, նրանք դատապարտեցին ոստիկանների կոշտ գործելաոճը և կոչ արեցին անհապաղ ազատ արձակել ձերբակալված քաղաքացիներին։
Սակայն պաշտոնական Մոսկվան իր հերթին Արևմուտքին մեղադրել է իր ներքին գործերին միջամտելու մեջ։

Նախօրեին Ռուսաստանի կենտրոնական ընտրական հանձնաժողովի աշխատանքային խումբը հերթական անգամ քննարկել է չգրանցված թեկնածուների բողոքները և Մոսկվայի ընտրական հանձնաժողովին առաջարկել չգրանցել հինգ ընդդիմադիրների, այդ թվում՝ Լյուբով Սոբոլին և Դմիտրի Գուդկովին։ Սոբոլը դեռևս 25 օր առաջ հացադուլ է հայտարարել։

Ինչպես հայտնի է, որ բողոքի նոր ակցիան Մոսկվայում կանցկացվի օգոստոսի 10-ին։ Մոսկվայի իշխանություններն արտոնել են բողոքի երթն ու հավաքը Սախարովի հրապարակում, իսկ ընդդիմադիրները կոչ են անում նորից հավաքվել Մոսկվայի օղակաձև այգում, որտեղ բողոքի ակցիան արտոնված չէ։

Կարելի է կանխատեսել, որ Մոսկվայում մի քանի օրից կայանալիք բողոքի ակցիան կլինի ավելի մարդաշատ, քան նախորդը։ Իհարկե, չի բացառվում իրավապահների կոշտ գործելաոճը նաև այս ակցիայի ընթացքում։

Մետաքսյա Շալունց