Պուտինը պահելու է ինտրիգը

Ռուսաստանի գործող օրենսդրությամբ՝ Վլադիմիր Պուտինը չի կարող երեք անգամ անընդմեջ (իսկ ընդհանուր առմամբ՝ հինգ անգամ) առաջադրվել նախագահի թեկնածու, ուստի չի կարող մասնակցել 2024 թվականի նախագահական ընտրություններին:

Ու այստեղ հարց է ծագում՝ ո՞վ է լինելու Ռուսաստանի հաջորդ նախագահը...

Երկար ժամանակ է, ինչ այս հարցին փորձում են պատասխանել ողջ աշխարհից, լրագրողներ, մեկնաբաններ, փորձագետներ, քաղաքական գործիչներ ու դիվանագետներ: Իսկ Ռուսաստանում վերջին օրերին տեղի ունեցող իրադարձությունները՝ հասարակության նկատմամբ ուժի կիրառումը իրավապահների կողմից լրացուցիչ ազդակ էր այն մասին, որ հնարավոր է իշխանության ներսում է տարբեր թեւերի մեջ բախումն արագանա:

Այսպես, «Լևադա-Կենտրոնի» վերջին հարցումների տվյալներով՝ ռուսաստանցիների 38 տոկոսը չի ցանկանում, որ 2024 թվականից հետո Վլադիմիր Պուտինը մնա նախագահի պաշտոնում: Նման կարծիք հայտնող ռուսաստանցիների թիվը վերջին մեկ տարվա ընթացքում աճել է 11 տոկոսով:

Կրեմլում Պուտինի մնալուն կողմ են արտահայտվել հարցվածների 54 տոկոսը: Ռեկորդային ցածր է չկողմնորոշվածների քանակը՝ ընդամենը 8 տոկոս: Հարցումն անցկացվել է հուլիսի 18-24-ը:

Իսկ Մոսկվայում հուլիսի 27-ի չարտոնված բողոքի ակցիայից հետո 41 մարդ է կալանավորվել և դատապարտվել 3-ից մինչև 15 օրվա ազատազրկման։ Անկախ OVD-Info կայքը հաղորդում է, որ այս թիվը կարող է աճել, քանի որ 79 հոգու էլ տարբեր վարչական տուգանքների են ենթարկել, և դատական լսումները դեռ շարունակվում են։

Հուլիսի 29-ին Մոսկվայի դատարանը տասն օրվա ազատազրկման է դատապարտել Մոսկվայի Կրասնոսելսկի շրջանի ղեկավար Իլյա Յաշինին՝ հանրային միջոցառումներ կազմակերպելու կարգը խախտելու մեղադրանքով։

Հիշեցնենք, անցյալ շաբաթ օրը Մոսկվայում անցկացվեց բազմամարդ բողոքի չարտոնված ցույց, որի ժամանակ ոստիկանությունը բերման ենթարկեց շուրջ 1400 քաղաքացիների:
Պուտինը, թերեւս, դեռ երկար կպահի ինտրիգը՝ չպատասխանելով հարցին, թե ում է տեսնում ՌԴ նախագահի պաշտոնում:

Մետաքսյա Շալունց